پارێزگار كه‌ركوك به‌وه‌كاله‌ت، بڕیاری رووخاندنی ژماره‌یه‌ك خانووی گه‌ڕه‌كه كوردنشینه‌كانی ده‌رده‌كات، ئه‌ندامێكی ئه‌نجومه‌نی پارێزگاكه‌ش ده‌ڵێت: ئه‌و بڕیاره‌ی پارێزگار جێگه‌ی قبوڵكردن نییه.
بەگوێره‌ی نوسراوێكی راكان سەعید جبوری پارێزگاری كەركوك بەوەكالەت، كە رۆژی 6/3/2018 رەوانەی چەند لایەنێكی پەیوەندیداری شارەكەی كردووە، داوای رووخانی خانووی زیادەڕۆیی لە گەڕەكەكانی باروتخانه و چه‌نجا عه‌لی فه‌یله‌ق كردووە.
له‌مباره‌یه‌وه جوان حه‌سه‌ن زه‌نگه، ئه‌ندامی ئه‌نجومه‌نی پارێزگای كه‌ركوك رایگه‌یاند: به‌دواداچونمان بۆ ئه‌و نوسراوه‌ی پارێزگاری كه‌ركوك كردووه كه تایبه‌ته به گه‌ڕه‌كه‌كانی باروتخانه و پانجا عه‌لی و فه‌یله‌ق، پارێزگاری كه‌ركوك به وه‌كاله‌ت پێی راگه‌یاندوین: لابردنی زیاده‌ڕۆی ته‌نها گه‌ڕه‌كه نوێیه‌كان ده‌گرێته‌وه و ئێستاش ده‌ستی پێكردووه.
وتیشی: ده‌ست بردن بۆ رووخاندنی ئه‌م گه‌ڕه‌كانه، جێگه‌ی قبوڵ نییه، چونكه گه‌ڕه‌كه‌كانی باروتخانه و پانجا عه‌لی و فه‌یله‌ق له دوای ساڵی 2003 دروست كراون.
ڕۆژی 16ی ئۆکتۆبەری ساڵی ڕابردوو، حەشدی شەعبی و چەند میلیشیایەکی دیکە، بەڕێککەوتن و هاوكارى لەگەڵ گرووپێکی خیانەتکارى لایه‌نێكى كوردى، پەلاماری شارى کەرکووک و خورماتوو و خانەقینیان داو دەستیان بە سەر ئه‌و ناوچانه‌دا گرت و سەدان ھاووڵاتیی کوردیان شەھید و بریندار کردو نزیکەی 200 ھەزار کەسیش لەو سنوورانە ئاوارە بوون ، سه‌ربارى ئه‌وه‌ى چه‌ندین دوكان و خانووى هاووڵاتیانى كوردیان له‌و ناوچانه سووتاند.
کۆمێنت (0)
تا ئێستا هیچ کۆمێنتێک نەکراوە.