عەبدولعەزیز خالید شەممەری وه‌ک باڵیۆزی سعودیە لە عێراق دیاریکرا 

ژمارەیەک باڵیۆزی نوێی سعودیە لە بەردەم شای سعودیە سوێندی یاساییان خوارد، لە نێویاندا باڵیۆزی نوێی سعودیە لە عێراق هەبوو.

ئەو باڵیۆزانه‌ رۆژی یەکشەممە 5/11/2017 لەبەردەم سەلمان بن عەبدولعەزیز، شای سعودیە سوێندنی یاساییان خوارد، بریتین بوون لە:

- عەبدولعەزیز بن خالید شەممەری، باڵیۆزی سعودیە لە عێراق. 
- وەلید بن محەممەد یەعقوب، باڵیۆزی سعودیە لە لوبنان.
- زوهێر بن محەممەد ئیدریسی، نوێنەری هەمیشەیی سعودیە لە رێکخراوی هاوکاریی ئیسلامی.
- سەعد بن محەممەد عرێفی، نوێنەری هەمیشەیی سعودیە لە یەکێتیی ئەوروپا.

پێشتر سامر سەبهان باڵیۆزی سعودیە بوو لە عێراق، بەڵام بەهۆی دروستبوونی گرژی لەگەڵ بەپرسانی عێراق و قوڵبوونەوەی ناکۆکییەکان، مانگی ئابی 2016 عێراقی جێهێشت و کرایە وەزیری دەوڵەتی سعودیە بۆ کاروباری کەنداو.

لەو کاتەوە عەبدولعەزیز بن خالید شەممەری کاروبارەکانی باڵێۆزخانەی سعودیەی لە بەغدا بەڕێوەدەبات، بەڵام ئەمڕۆ بەفەرمی وەک باڵیۆز دەستبەکاربوو. 

جگە لە بەغدا لە 22-2-2016 ەوە سعودیە کونسوڵخانەی لە هەولێر کردووەتەوە.