فیلمی سینه‌مایی كوردی "زاگرۆس" له 18یه‌مین خولی فێستیڤاڵی نێوده‌وڵه‌تیی فیلمی ئاره‌س – Arrasـدا به‌شداره.
فێستیڤاڵه‌كه له 3 تاوه‌كو 12 تشرینی دووه‌م/ نۆڤێمبه‌ر له شاری ئاره‌س له فه‌ڕه‌نسا به‌ڕێوه‌ده‌چێت.
ته‌نها 9 فیلم له به‌شی پێشبڕكێی فێستیڤاڵه‌كه‌دا له به‌شی پێشبڕكێدان و كێبڕكی بۆ به‌ده‌ستهێنانی خه‌ڵاتی باشترین فیلمی فێستیڤاڵ ده‌كه‌ن، "زاگرۆس" یه‌كێك له‌و فیلمانه‌یه.
له‌لایه‌كی دیكه‌وه ئه‌م به‌رهه‌مه سینه‌ماییه له 44مین خولی فێستیڤاڵی نێوده‌وڵه‌تیی فیلمی گێنت – Gentـدا به‌شدارده‌بێت كه به گه‌وره‌ترین و گرنگترین فێستیڤاڵی سینه‌مایی له به‌لژیكادا ده‌ناسرێت.
له به‌شی پێشبڕكێی فیلم له فێستیڤاڵدا، 12 فیلم له كێبڕكێدان، به‌ڵام ته‌نها یه‌ك فیلم نوێنه‌رایه‌تی به‌لژیكا ده‌كات، ئه‌ویش "زاگرۆس"ـه كه چیرۆكێكی كوردی هه‌یه و گرێدراوی به‌لژیكایه.
چالاكییه‌كانی فێستیڤاڵ له 10 تاوه‌كو 20 تشرینی یه‌كه‌م/ ئۆكتۆبه‌ر له شاری گێنت له به‌لژیكا به‌ڕێوه‌ده‌چێت.
"زاگرۆس" چیرۆكی شوانێك به‌ناوی زاگرۆس ده‌گێڕێته‌وه كه هاوژینی خۆی زۆر خۆشده‌وێت، بۆ ئه‌و كوردستان به‌هه‌شته، به‌ڵام هاوژینه‌كه‌ی هاڤین و كچه‌كه‌ی ره‌یهان، رووده‌كه‌نه به‌لژیكا، دواتر زاگرۆزیش بڕیارده‌دات بچێته ئه‌و وه‌ڵاته.
ئه‌م به‌رهه‌مه سینه‌ماییه له باكووری كوردستان، یۆنان و به‌لژیكا وێنه‌گیراوه، له‌م به‌رهه‌مه سینه‌ماییه‌دا، هه‌ریه‌كه له فه‌یاز دۆمان، حه‌لیما ئێلته‌ر و سوات ئۆستا و هونه‌رمه‌ندی گۆرانیبێژی ناسراوی كورد، هۆزان براده‌ر، رۆڵ ده‌گێڕن.
"زاگرۆس" به‌رهه‌مێكی هاوبه‌شی به‌لژیكا و هۆڵه‌ندایه، پرۆدیۆسه‌ری سه‌ره‌كی فیلمه‌كه دریس فالیپۆیه و سه‌هیم عومه‌ر جه‌ین- كلود و ڤان ریچكهام سیناریۆكه‌یان ئاماده‌كردووه.
كاری وێنه‌گرتن، ده‌نگ و مۆنتاژی فیلمه‌كه، له‌لایه‌ن سینه‌ماكارانی به‌لژیكی و هۆڵه‌ندییه‌وه كراوه.
سه‌رچاوه /ئاژانسی زاگرۆس
كوردستان تیڤی/ كامه‌ران حاجی
کۆمێنت (0)
تا ئێستا هیچ کۆمێنتێک نەکراوە.