ئێران: ئەگەر هێرش بکرێتە سەر وڵاتەکەمان یۆرانیۆم بە ڕێژەی 90% دەپیتێنین

وتەبێژی لیژنەیەکی پەرلەمانی ئێران ڕایگەیاند، وڵاتەکەی توانای تەواوی هەیە ڕێژەی پیتاندنی یۆرانیۆم بگەیەنێتە 90%، ئەگەر بێتو ئەمریکا هێرشە سەربازییەکانی بۆ سەر ئێران دەستپێبکاتەوە

ئەمڕۆ سێشەممە 12ـی ئایار ئیبراهیم رەزایی، وتەبێژی لیژنەی ئاسایشی نیشتمانی و سیاسەتی دەرەوە لە پەرلەمانی ئێران، ڕایگەیاند: تاران لە ئەگەری هەر هێرشێکی نوێدا بژاردەی پیتاندنی یۆرانیۆم بۆ ئاستی 90% چالاک دەکات.

رەزایی لە بڵاوکراوەیەکدا لە هەژماری فەرمی خۆی لە تۆڕی کۆمەڵایەتی ئێکس نووسیویەتی: پیتاندن بە ڕێژەی 90% ڕەنگە یەکێک بێت لە بژاردە بەردەستەکانی ئێران لە ئەگەری ڕووبەڕووبوونەوەی هەر هێرشێکی تر ئێمە لە پەرلەمان گفتوگۆ لەسەر ئەم بابەتە دەکەین.

جێی ئاماژەیە، گەیشتن بە ڕێژەی 90%ی پیتاندنی یۆرانیۆم بە واتای بەدەستهێنانی ئەو ئاستە دێت کە بۆ دروستکردنی چەکی ئەتۆمی بەکاردەهێنرێت.