ئێوارەخوانی پەیامنێرانی کۆشکی سپی (White House Correspondents Dinner - WHCD) بۆنەیەکی ساڵانەی گرنگە لە واشنتن دی سی، کە تێیدا ڕۆژنامەنووسان، بەرپرسانی حکوومی و کەسایەتییە ناودارەکان کۆ دەبنەوە.
ئەم ئێوارەخوانە لەلایەن کۆمەڵەی پەیامنێرانی کۆشکی سپی (WHCA) ڕێک دەخرێت کە ڕێکخراوێکی سەربەخۆیە و نوێنەرایەتیی ئەو ڕۆژنامەنووسانە دەکات کە ڕووماڵی هەواڵەکانی سەرۆکی ئەمریکا و کۆشکی سپی دەکەن.
یەکەم ئێوارەخوان لە ساڵی 1921 بەڕێوەچووە و لە ساڵی 1924ـەوە بە شێوەیەکی نەریتی سەرۆکەکانی ئەمریکا بەشداری تێدا دەکەن.
ئامانجی سەرەکیی ئەم ئێوارەخوانە، کۆکردنەوەی کۆمەک و پارەیە بۆ خوێندن (سکۆلەرشیپ) بۆ قوتابیانی ڕۆژنامەوانی و هەروەها خەڵاتکردنی ئەو ڕۆژنامەنووسانەی کە کار و ڕاپۆڕتی نایابیان کردووە.
ئەم بۆنەیە بەوە ناسراوە کە تێکەڵەیەکە لە سیاسەت و کات بەسەربردن، هەروەها سەرۆکی ئەمریکاش وتارێکی کورت و پڕ لە گاڵتەوگەپ پێشکەش دەکات کە تێیدا ڕەخنە لە خۆی و نەیارە سیاسییەکان دەگرێت.
لە بەڕێوەچوونی ئێوارەخوانی ئەمساڵ لە (بەرەبەیانی ئەمڕۆ یەکشەممە 26ـی نیسانی 2026)، ڕووداوێکی نەخوازراو ڕوویدا کاتێک تەقە لە شوێنی بۆنەکە کرا و بووە هۆی تێکچوونی کەشی ئێوارەخوانەکە و شڵەژانی بەشداربووان. دۆناڵد ترەمپ، سەرۆکی ئەمریکا و میلانیای هاوسەری لەلایەن پاسەوانە نهێنییەکانەوە لە شوێنەکە گوازرانەوە و هیچ زیانێکیان بەرنەکەوت.
ڕووداوی تەقەکردنەکە لە هۆتێلی (Washington Hilton) ڕوویدا کە شوێنی بەڕێوەچوونی ئێوارەخوانەکە بوو.
دواتر هێزە ئەمنییەکان ڕایانگەیاند، گومانلێکراوەکە دەستگیر کراوە، کەسێکە بە ناوی (کۆڵن ئاڵن) و تەمەنی 31 ساڵە، پیشەی مامۆستایە و دانیشتووی ویلایەتی کالیفۆرنیایە.
کەناڵی سی بی ئێسی ئەمریکی بڵاوی کردەوە، تەقەکەرەکە دانی بەوەداناوە کە ویستوویەتی بەرپرسانی ئیدارەی ترەمپ بکاتە ئامانج.
کۆمێنت (0)
تا ئێستا هیچ کۆمێنتێک نەکراوە.