ئەمریکا و شەش وڵاتی عەرەبی لە بەیاننامەیەکی هاوبەشدا بە توندی سەرکۆنەی هێرشە مووشەکی و درۆنییەکانی کۆماری ئیسلامیی ئێران دەکەن و ڕایانگەیاند، ئەم ڕەفتارانە تێکدانی سەقامگیریی ناوچەکەیە.
ڕۆژی دووشەممە 2ـی ئادار، وڵاتانی (قەتەر، سعوودیە، بەحرەین، ئوردن، کوێت، ئیمارات و ئەمریکا) لە دۆحەی پایتەختی قەتەر بەیاننامەیەکی هاوبەشیان بڵاو کردەوە.
لە بەیاننامەکەدا جەخت کراوەتەوە: "بە توندی ئیدانەی هێرشە هەرەمەکی و سەرەڕۆییەکانی کۆماری ئیسلامیی ئێران دەکەین کە بە مووشەک و فڕۆکەی بێفڕۆکەوان کردوویەتە سەر خاکە خاوەن سەروەرییەکان لە سەرتاسەری ناوچەکەدا، لەوانەش: بەحرەین، عێراق (بە هەرێمی کوردستانی عێراقیشەوە)، ئوردن، کوێت، عومان، قەتەر، شانشینی عەرەبیی سعوودیە و ئیماراتی عەرەبیی یەکگرتوو".
ئەو حەوت وڵاتە ڕایانگەیاندووە: "ئەم گورزە بێ پاساوانە خاکی خاوەن سەروەرییان کردووەتە ئامانج، ژیانی مەدەنییەکانیان خستووەتە مەترسییەوە و زیانیان بە ژێرخانی مەدەنی گەیاندووە".
هەروەها لە بەیاننامەکەدا هاتووە: "ڕەفتارەکانی ئێران هەڵکشانێکی مەترسیدار نیشان دەدەن کە سەروەریی ژمارەیەک دەوڵەت پێشێل دەکات و هەڕەشە لە سەقامگیریی ناوچەکە دەکات. بەئامانجگرتنی مەدەنییەکان و ئەو دەوڵەتانەی کە تێوەنەگلاون لە کارە دوژمنکارییەکاندا، ڕەفتارێکی سەرەڕۆیانەیە و سەقامگیری دەشێوێنێت".
لە کۆتایی بەیاننامە هاوبەشەکەدا ئاماژە بە کراوە: "ئێمە وەک یەک ڕیز دەوەستینەوە بۆ بەرگریکردن لە هاووڵاتییان و سەروەری و خاکەکەمان، جەخت لە مافی خۆمان دەکەینەوە بۆ بەرگری لە خۆکردن لە ڕووی ئەم هێرشانەدا، پابەندبوونی خۆمان بە ئاسایشی ناوچەیی دووپات دەکەینەوە و ستایشی هەماهەنگیی کارا دەکەین لە بواری بەرگریی ئاسمانی و مووشەکیدا کە ڕێگر بوو لە کەوتنەوەی زیانی گیانی و وێرانکاریی گەورەتر".
کۆمێنت (0)
تا ئێستا هیچ کۆمێنتێک نەکراوە.