بەڕێوەبەرایەتیی حەج و عومرەی هەرێمی کوردستان ڕایگەیاند، ئەو 200 عومرەکارەی کە بەهۆی ڕاگرتنی گەشتە ئاسمانییەکانەوە لە فڕۆکەخانەی مەدینە گیریان خواردبوو، بە سەلامەتی گەڕانەوە.
کاروان ستونی، گوتەبێژی فەرمی حەج و عومرەی کوردستان ڕاگەیاند: ئێوارەی ئەمڕۆ یەکشەممە 1ـی ئازار، ئەو عومرەکارانەی کە لە فڕۆکەخانەی مەدینە گیریان خواردبوو، بە سەلامەتی لە ڕێگەی وشکانییەوە گەیشتنەوە هەرێمی کوردستان.
گوتەبێژی فەرمی حەج و عومرە ئاماژەی بەوە کرد، ژمارەی ئەو عومرەکارانە 200 کەس دەبوون و دوێنی بە بەردەوامی بەڕێوەبەرایەتیی گشتی حەج و عومرە لەسەر هێڵ بووە تاوەکو گەڕێندرانەوە هەرێمی کوردستان.
لە کۆتایی قسەکانیدا، گوتەبێژی فەرمی حەج و عومرەی کوردستان ڕوونی کردەوە، تاوەکو بارودۆخی ناوچەکە بەم شێوەیە بێت لە ئەگەری نەبوونی فڕۆکە، ناچار دەبن عومرەکارەکان بە ڕێگەی وشکانی بگەڕێندرێنەوە. هەروەها داواشی لە هاووڵاتییان کرد لەم کات و ساتەدا گەشتەکانیان دوابخەن تاوەکو ئەم باردودۆخە کۆتایی دێت.
کۆمێنت (0)
تا ئێستا هیچ کۆمێنتێک نەکراوە.