بەهۆی خۆپیشاندان و ناڕەزایەتییەكانی چەند رۆژی رابردووی شارەكانی ئێران تا ئێستا 38 ئەندامی هێزە ئەمنییەكان كوژراون، لەبەرامبەریشدا بەلایەنی كەم 12 هاووڵاتی سڤیل كوژراون.
ئاژانسی رادیۆ و تەلەفزیۆنی ئێران (IRIB) بڵاوی كردۆتەوە: بەهۆی خۆپیشاندان و ناڕەزایەتییەكان لە سەرجەم شارەكانی ئێران تا ئێستا 38 پۆلیس و ئەندامی هێزە ئەمنییەكان كوژراون.
دوایین ئامارەكان دەری دەخەن كە لە پارێزگای كرماشان 6 ئەندامی هێزە ئەمنییەكان و لە پارێزگای خوراسانی باكور 7ی دیكە كوژراون.
خۆپیشاندان و ناڕەزایەتییەكان لە ئێران لە كۆتاییەكانی 2025 بەهۆی خراپی دۆخی ئابووری و بەرزبوونەوەی بەردەوامی نرخی كەلوپەل دەستیان پێ كرد، خۆپیشاندانەكان لە رۆژی 8ی ئەم مانگە گەیشتنە لووتكە.
بەگوێرەی ئامارە نافەرمییەكان تا ئێستا 12 خۆپیشاندەر و هاووڵاتی سڤیل كوژراون كە لەنێویاندا منداڵ و ئافرەت هەن.
پێشتر عەلی ڕەزا زاكانی سەرۆكی شارەوانی تاران رایگەیاندبوو: بەهۆی خۆپیشاندانەكان 25 مزگەوت، 26 بانك، 3 بنكەی تەندروستی، 10 باڵەخانەی حكوومەت و چەندان ئۆتۆمبێلی ئاگركوژێنەوە و فریاكەوتن و پۆلیس زیانیان بەركەوتووە و سوتێنراون.
سەرۆكی شارەوانی تارانی پایتەختی ئێران هەریەك لە ئیسرائیل و ئەمریكای تۆمەتبار كرد كە لە پشت خۆپیشاندەرانەوەن بۆ ئاژاوەگێڕی و كاری تێكدەرانە لە ناوخۆی وڵاتدا.
کۆمێنت (0)
تا ئێستا هیچ کۆمێنتێک نەکراوە.