ئیدارەی دۆناڵد ترەمپ سەرۆكی ئەمریكا تا ئێستا بڕیاری رێگریكردن لە هاندەرانی 4 وڵات دەركردووە لە یارییەكانی مۆندیالی 2026 سەردانی وڵاتەكەیان بكەن، رەنگە ئەم رێگەگرتنە بۆ 15 وڵات بەرز بكرێتەوە.
بڕیارە یارییەكانی مۆندیالی 2026 لە یاریگەكانی ئەمریكا و كەندا و مەكسیك لە رێكەوتی 11ی حوزەیران تا 19 تەمووزی ساڵی داهاتوو بەڕێوەبچێت.
مۆندیالی 2026 بۆ یەكەمجار بە بەشداری 48 هەڵبژاردە بەڕێوەدەچێت، تا ئێستا ناوی 42 هەڵبژاردە یەكلایی بووەتەوە، 6 هەڵبژاردەكەی دیكە بەشێوەی پاشكۆی ئەوروپا و جیهان سەردەكەون كە لەنێویاندا هەڵبژاردەی عێراق هەیە و یارییەكان لە مانگی ئاداری ساڵی داهاتوو بەڕێوەدەچن.
رۆژنامەی (ئیندیپێندت)ی ئینگلیزی بڵاوی كردۆتەوە: كۆشكی سپی ئەمریكا لە نوێترین بڕیاریدا رێگەی لە هاندەرانی هەردوو هەڵبژاردەی سەنیگال و كۆتدیڤوار گرت بێنە وڵاتەكەیان، پێشتریش بڕیاری رێگەگرتنی لە هاندەرانی هەردوو هەڵبژاردەی ئێران و هاییتی دەركردبوو.
رۆژنامەكە ئاماژەی بەوەشداوە كە چاوەڕوان دەكرێت رێگرییەكانی ئەمریكا بۆ هاندەرانی 15 هەڵبژاردەی جیهان درێژ بكرێتەوە.
ئیدارەی دۆناڵد ترەمپ هۆكاری ئەم رێگرییانەی بۆ پاراستنی ئاسایشی نیشتمانی و ترسی نەگەڕانەوەی هاندەرانی ئەو وڵاتانە گەڕاندۆتەوە.
کۆمێنت (0)
تا ئێستا هیچ کۆمێنتێک نەکراوە.