وتەبێژی باڵای هێزە چەکدارەکانی کۆماری ئیسلامیی ئێران ڕایگەیاند، هێڵەکانی بەرهەمهێنانی مووشەک لە وڵاتەکەیان دوای "جەنگی 12 ڕۆژە"، بە وتەی ئەو "بۆ ساتێکیش" دانەخراون و نەوەستاون.
ئەبولفەزل شکارچی، ڕۆژی چوارشەممە لە زانکۆی پیشەسازیی شەریف جەختی کردەوە ئێستا هێڵەکانی بەرهەمهێنانی چەک و تەقەمەنی لە وڵاتەکەدا چالاکن.
بەدوای جەنگی 12 ڕۆژەی نێوان ئێران و ئیسرائیل، بەشێک لە سیستمی بەرگریی ئاسمانی و دامەزراوە مووشەکییەکانی ئێران زیانیان بەرکەوت. لە بەرامبەردا، تاران سەدان مووشەکی بالیستیک و درۆنی ئاراستەی ئیسرائیل کرد؛ هەرچەندە زۆربەیان لەلایەن بەرگریی ئیسرائیلەوە خرانە خوارەوە، بەڵام بەشێکیان بەر ناوەندە سەربازی و شارەکانی ئەو وڵاتە کەوتن و زیانی زۆریان لێکەوتەوە.
ڕاپۆرتەکان ئاماژە بەوە دەکەن کە تاران بە شێوەیەکی چالاک هەوڵی نۆژەنکردنەوەی توانای مووشەکیی خۆی دەدات.
کۆماری ئیسلامی بۆ بەرهەمهێنانی بە کۆمەڵی چەک و کەرەستەی سەربازی، ناچارە بەشێک لە کەرەستە سەرەتاییەکان و ئامێرە پێویستەکان لە دەرەوە هاوردە بکات، ئەمەش لە کاتێکدایە کە سزا توندە نێودەوڵەتییەکان بەربەستی گەورەیان لەبەردەم دابینکردنی ئەو پێداویستییانە بۆ ئێران دروست کردووە.
کۆمێنت (0)
تا ئێستا هیچ کۆمێنتێک نەکراوە.