جێگری سەرۆکی کۆمیسیۆنی پلان و بودجەی پەرلەمانی ئێران رایگەیاند بە هۆی دابەزینی نرخی نەوت و فرشتنی نەوت بە ڕێژەیەکی کەمتر لە ڕێژەی پێشبینیکراو، تا بەر لە نەورۆز کورتهێنانی بودجە دەگاتە 25 ملیار دۆلار.
هادی قەوامی بە ئاژانسی مێهری راگەیاند بە پێی لێکۆڵینەوەکان ئێران لە 7 مانگی رابردوودا نزیک 12 ملیار دۆلار کورتهێنانی بودجەی هەبووە و ئەگەر دۆخەکە هەر وا بەردەوام بێت ئەم کورتهێنانە تا بەر لە نەورۆز دەگاتە 25 ملیار دۆلار.
بە گوتەی قەوامی لە پرۆژەیاسای بودجەی ئەمساڵدا پێشبینی کرابوو ڕۆژانە 1 ملیۆن و 800 هەزار بەرمیل نەوت هەناردە بکرێت و نرخی هەر بەرمیل نەوتیش بە 60 دۆلار دانبرابوو بەڵام بە کردەوە لە ماوەی شەش مانگی بەهار و هاویندا، ئێران ڕۆژانە 1 ملیۆن و 600 هەزار بەرمیل نەوتی فرۆشتووە و تێکڕای نرخی هەر بەرمیل نەوتیش 51 دۆلار بووە.
حەفتەی ڕابردوو ئاژانسی رۆیتەرز ئاشکرای کرد داشکاندنەکانی ئێران بۆ کڕیارانی نەوتی ئەم وڵاتە لە چین گەیشتووەتە بەرزترین ئاست لە مێژووی خۆیدا و ئەم وڵاتە بۆ قەرەبوو کردنەوەی مەترسییەکانی گەمارۆکانی ئەمریکا بۆ سەر کڕیارەکان، نەوتەکەی بە 10 دۆلار هەرزانتر لە نرخی بازاڕ دەفرۆشێت.
کۆمێنت (0)
تا ئێستا هیچ کۆمێنتێک نەکراوە.