وەزیری دەرەوەی ئێران دەڵێت، ئاڵوگۆڕی پەیام لەگەڵ ئەمریکا بەردەوامە، بەڵام گەڕانەوە بۆ شێوازی گفتوگۆکانی پێش شەڕ مەحاڵە و هەر دانوستاندنێکی نوێ دەبێت لەسەر بنەمای رێزی بەرامبەر بێت.
ئەمڕۆ شەممە، 6ـی ئەیلوولی 2025، عەباس عێراقچی، وەزیری دەرەوەی ئێران، رایگەیاند: ئاڵوگۆڕی پەیام لەگەڵ ویلایەتە یەکگرتووەکانی ئەمریکا بۆ دەستپێکردنەوەی دانوستاندنەکان بەردەوامە و جەختیشی کردەوە، هەر گفتوگۆیەکی نوێ لەگەڵ واشنتن دەبێت لەسەر بنەمای رێزی بەرامبەر بێت و نیگەرانییەکانی وڵاتەکەی لەبەرچاو بگیرێت.
عەباس عێراقچی لە لێدوانێکی رۆژنامەوانیدا رایگەیاند: "ئەوروپییەکان ئێستا زیاتر لە دۆخەکە تێگەیشتوون." هاوکات هۆشداریشی دا کە کاراکردنی میکانیزمی پەلەپیتکە (snapback) لەلایەن ئەوروپییەکانەوە هەڵەیەکی گەورەیە و لەوانەیە دۆخەکە ئاڵۆزتر بکات.
وەزیری دەرەوەی ئێران گوتیشی: "گەڕانەوە بۆ دانوستاندنە ئەتۆمییەکان لەگەڵ ئەمریکا بەو شێوەیەی پێش شەڕ بوو، مەحاڵە." روونیشیکردەوە: دانوستاندنەکانی دوای شەڕ شێوازێکی دیکەیان دەبێت، بەهۆی ئەو لێکەوتە و قوربانیدانانەی وڵاتەکەی بینیویەتی.
لە کۆتاییدا، جەختی کردەوە: "دانوستاندنەکانی ئێران لەگەڵ ئەوروپییەکان بەردەوامە و وڵاتەکەی ئامادەیە دەست بە گفتوگۆ لەگەڵ واشنتن بکات، ئەگەر لەسەر بنەمای رێزی بەرامبەر بێت".
کۆمێنت (0)
تا ئێستا هیچ کۆمێنتێک نەکراوە.