دوای نیوەڕۆی ئەمڕۆ دووشەممە ئاوی ئیفراز سێی هەولێر بەهۆی كاركردن لە پڕۆژەیەكی نیشتەجێبوون شكا، بەڕێوەبەری ئاوی هەولێر دەڵێت "ئەمشەو بۆڕییەكە چاك دەكرێتەوە و بەیانی ئاو دەدرێتەوە بە هاووڵاتییان".
ڕابەر حوسێن بەڕێوەبەری ئاوی هەولێر بە (کوردستان تیڤی) ڕاگەیاند: دوا نیوەڕۆی ئەمڕۆ دووشەممە لەسەر شەقامی 120 مەتری هەولێر لە ئەنجامی کارکردن لە پڕۆژەیەکی نیشتەجێبوون، بۆڕی ئاوی ئیفراز سێ شكا.
راشیگەیاند: دوای شكانی بۆڕییەكە، راستەوخۆ و دەستبەجێ تیمەکانی چاککردنەوە لە بەڕێوەبەرایەتی ئاوی هەولێر گەیشتنە شوێنی ڕووداوەکە و دەستیان بە کارکردن كرد لە شوێنی شکانی بۆڕییەکە.
ڕابەر حوسێن هەروەها رایگەیاند: تاوەکو ئێستا کارکردن لەسەر شوێنی شکانی بۆڕییەکە لەلایەن تیمەكانەوە بەردەوامە.
بەڕێوەبەری ئاوی هەولێر ئاماژەشی دا: ئەمشەو کارەکانی چاککردنەوە تەواو دەبێت و بۆ بەیانی ئاو دەگەڕێتەوە بۆ هاوبەشان لە شاری هەولێر.
پرۆژەی ئاوی ئیفراز سێ یەکێکە لە پڕۆژەکانی دابینکردنی ئاوی خواردنەوە بۆ شاری هەولێر کە 40%ی گەڕەکەکانی شاری هەولێر سەرچاوەی ئاوی خواردنەوەیان ئاوی ئیفراز سێیە.
هەولێر / ئالان ئەحمەد
کۆمێنت (0)
تا ئێستا هیچ کۆمێنتێک نەکراوە.