كۆشكی سپی ئەمریكا ئاشكرای دەكات، كاری ئەمجارەی دۆناڵد ترەمپ سەرۆكی ئەمریكا بریتی دەبێت لە راگەیاندنی ئاگربەست و كۆتاهاتنی جەنگ لە كەرتی غەززە.
كارۆلین لیڤیت گوتەبێژی كۆشكی سپی ئەمریكا ئەمڕۆ دووشەممە لە كۆنگرەیەكی رۆژنامەوانیدا گوتی: لەم هەفتەیەدا ستێف ویتكۆف نوێنەری تایبەتی ترەمپ دەگاتە قەتەڕ بۆ دەستپێكردنی گفتوگۆ راستەوخۆكان لەنێوان ئیسرائیل و حەماسدا.
لیڤیت گوتیشی: ئێستا كاری لەپێشینەی دۆناڵد ترەمپ راگەیاندنی ئاگربەست و راگرتنی جەنگە لە كەرتی غەززە لەگەڵ ئازادكردنی سەرجەم بارمتەكان.
ئەم لێدوانەی گوتەبێژی كۆشكی سپی ئەمریكا لەكاتێكدایە كە بنیامین نەتانیاهۆ سەرۆك وەزیرانی ئیسڕائیل ئەمڕۆ دووشەممە گەیشتۆتە ئەمریكا و بڕیارە لەگەڵ دۆناڵد ترەمپ سەرۆكی ئەو وڵاتە كۆببێتەوە.
دۆناڵد ترەمپ سەرۆكی ئەمریكا پێشتر رایگەیاندبوو كە لەم هەفتەیەدا ئاگربەست لەنێوان ئیسرائیل و بزووتنەوەی حەماس رادەگەیەنرێت و جەنگ لە كەرتی غەززە كۆتایی دێت.
کۆمێنت (0)
تا ئێستا هیچ کۆمێنتێک نەکراوە.