ڕۆژنامەیەکی ئیسرائیلی ئاشکرای کرد لە ماوەی جەنگی 12 ڕۆژەی نێوان ئێران و ئیسرائیلدا، سعوودیە لە ئۆپەراسیۆنی خستنەخوارەوەی مووشەک و درۆنەکانی ئێراندا بەشدار بووە.
رۆژی پێنجشەممە 3ی تەمووزی 2025، ڕۆژنامەی "ئیسرائیل هەیوم" بە پشتبەستن بە زانیارییەکانی چەند سەرچاوەیەکی ئاگادار ئاشکرای کرد، لە جەنگی ئێران و ئیسرائیلدا، ژمارەیەک لە وڵاتانی ناوچەکە و یەک لەوانیش سعوودیە، لە ئۆپەراسیۆنی خستنەخوارەوەی مووشک و درۆنەکانی ئێراندا بەشدارییان کردووە.
بە پێی ئەم ڕاپۆرتە، هێزی ئاسمانیی سعوودیە بە ناردنی درۆنی سەربازی، درۆنەکانی ئێرانی لەسەر خاکی عێراق و ئوردن تەقاندووەتەوە.
حکوومەتی سعوودیە کە یەکێک لە بەهێزترین سوپاکانی ناوچەکەی هەیە، تا ئێستا بە فەرمی بەشداری لەم ئۆپەراسیۆنانەی پشتڕاست نەکردووەتەوە و پێشتریش لە ڕاگەیاندراوێکدا، هێرشی ئیسرائیل بۆ سەر خاکی کۆماری ئیسلامیی ئێرانی ئیدانە کردبوو.
لە ماوەی 12 ڕۆژ جەنگی ئێران و ئیسرائیلدا هەر یەک لە وڵاتانی ئوردن، بریتانیا، فەڕەنسا لە ڕێگای فرۆکەی جەنگی و سیستەمی دژە مووشەکەوە هاوکاریی ئیسرائیلیان کرد بۆ ڕێگری لە گەیشتنی مووشەک و درۆنەکانی ئێران بە خاکی ئەم وڵاتە. ئەمریکاش هاوشانی سوپای ئیسرائیل، لە ڕێگای هێزی ئاسمانی و دەریایی و سیستەمەکانی بەرگریی پاتریۆت و تاد، بەربڵاوترین بەشداریی لەم ئۆپەراسیۆنەدا هەبوو.
کۆمێنت (0)
تا ئێستا هیچ کۆمێنتێک نەکراوە.