سەرجەم دانیشتووانی گوندی (ئەچیارۆلی) لە باشووری ئیتاڵیا بە تەندروستییەكی باشەوە زیاتر لە 100 ساڵ دەژین، بەگوێرەی تۆژینەوەیەك دەركەوتووە سیستەمی خۆراكی تەندروست و شێوازی ژیانكردنیان هۆكارە بۆ تەمەندرێژییان.
زانایان بۆ ماوەی 10 ساڵ تۆژینەوەیان لەسەر دانیشتووانی گوندەكە كردووە و بۆیان روون بووەتەوە كە سەرەڕای تەمەندرێژی، سەرجەم دانیشتووانی گوندەكە تەندروستییەكی باشیان هەیە.
ماڵپەڕی (سایتك دەیلی) لە راپۆرتێكدا تۆژینەوەی زاناكانی بڵاوی كردۆتەوە و ئاماژە بەوە دراوە: دانیشتووانی گوندەكە تەندروستییەكی باش و توانایەكی جەستەیی بەرزیان هەیە، هۆكارەكەش بۆ ئەوەیە كە سیستەمێكی خۆراكی تەندروست و شێوازی ژیانكردنی تایبەتیان هەیە.
لە راپۆرتەكەدا هەروەها هاتووە: 90%ی بەتەمەنەكانی گوندی ئەچیارۆلی خواردنیان بریتییە لە میوە، سەوزەی تازە، دانەوێڵە، پاقلەمەنییەكان، چەرەزات و زەیتی زەیتوون، هەروەها كەمترین رێژەی گۆشتی سووریش دەخۆن.
ئاماژە بەوەشدراوە كە دانیشتووانی گوندەكە رۆژانە زۆرترین جوولە دەكەن و كەمترین رێژەی فشار و دڵەڕاوكێی دەروونیان هەیە.
جەختیش لەوە كراوەتەوە، بەگوێرەی تۆژینەوەكان دەركەوتووە كە تەمەنی بایلۆجی دانیشتووانی گوندی ئەچیارۆلی زۆر بچووكترە لە تەمەنی دروستی خۆیان.
کۆمێنت (0)
تا ئێستا هیچ کۆمێنتێک نەکراوە.