بەڕێوەبەری گشتی کاروباری ئێران لە دەرەوەی وڵات دەڵێت، ئەمریکا بۆ جاری دووەمە هاووڵاتییانی وڵاتی موسڵمان بۆ ناو ئەمریکا قەدەغە دەکات و بە سیاسەتێکی ڕەگەزپەرستانە لە باسی دەکات.
ئەمڕۆ شەممە 7ـی حوزەیرانی 2025، عەلی رەزا هاشمی، بەڕێوەبەری گشتی کاروباری ئێران لە دەرەوەی وڵات رایگەیاند: "بڕیارەکەی ئەمریکا بەڵگەیەکی روونە لەسەر هەژموونی مەیلی باڵادەستی و ڕەگەزپەرستی لەنێو سیاسەتدارانی ئەمریکادا"
تاران ئیدانەی ئەمریکا دەکات و دەڵێت دەبێت شەرمەزاربن، چونکە لەناو ئەو 12 وڵاتەی قەدەغەی گەشتی هاووڵاتیانی لەسەرە هەمووی موسڵمانن و ئەمە نیشانەی ڕەگەزپەرستی ئیدارەی ئەمریکایە.
بەڕێوەبەری گشتی کاروباری ئێران لە دەرەوەی وڵات لە بەیاننامەیەکدا لە ماڵپەڕی ئێکس بڵاویکردووەتەوە: "بڕیاری قەدەغەکردنی چوونە ژوورەوەی هاووڵاتییانی ئێرانی بۆ ئەمریکا، تەنها لەسەر بنەمای ئایین و نەتەوەکەیان، نەک تەنها ئاماژەیە بۆ دوژمنایەتییەکی قووڵ بەرامبەر بە گەلی ئێران و موسڵمانان، بەڵکو پێشێلکردنی یاسا نێودەوڵەتییەکانە " .
رۆژی چوارشەممە تڕەمپ بڕیاریدا گەشتی هاووڵاتییانی 12 وڵات بۆ ناو ئەمریکا قەدەغە بکات و رۆژی دووشەمە بڕیار وایە بچێتە بواری جێبەجێ کردنەوە.
دۆناڵد ترەمپ سەرۆکی ئەمریکا ئەم قەدەغەکردنە بە پاراستنی ئاسایشی وڵاتەکەی ناو دەبات و دەڵێت؛ "نامەوێت هیچ کارێکی تیرۆرستی لە ئەمریکا ئەنجام بدرێت".
کۆمێنت (0)
تا ئێستا هیچ کۆمێنتێک نەکراوە.