زۆربەمان کاتێک خواردنێک هەڵدەبژێرین، تەنیا سەیری بڕی کالۆری و پرۆتین و چەورییەکەی دەکەین، بەڵام توێژینەوەیەکی نوێ ئاشکرای دەکات کە ئەم ژمارانە تەواوی چیرۆکەکە نانوێنن، چونکە جەستە بەرامبەر بە خۆراکی ئامادەکراو و خۆراکی سروشتی کاردانەوەی جیاوازی دەبێت.
توێژەرانی پەیمانگەی فرالین بۆ توێژینەوەی پزیشکیی بایۆمێدیک لە زانکۆی ڤێرجینیا تیکی ئەمریکی، لە توێژینەوەیەکدا کە لە گۆڤاری نیتچەر میتابۆلیزم بڵاوکراوەتەوە، 57 کەسی پێگەیشتووی خاوەن کێشی تەندروستیان کردە ئامانج. هەر بەشداربوویەک لە دوو ڕۆژی جیاوازدا دوو ژەمە خواردنی خوارد، کە هەریەکەیان 300 کالۆری بوو و لە ڕووی بڕی چەوری، پرۆتین، کاربۆهیدرات، ڕیشاڵ و سۆدیۆمەوە زۆر لێک نزیک بوون.
توێژەران تێبینییان کرد کە دوای خواردنی خۆراکی ئامادەکراو، جەستە کاردانەوەیەکی ئینسۆلینی بەرزتری هەبووە و وزەی زیاتری خەرج کردووە، لە هەمان کاتدا کەمتر پشت بە کاربۆهیدرات بەستراوە بۆ بەدەستهێنانی وزە بەراورد بەو ژەمەی کە ئامادەکراو نەبووە.
لە بەشێکی دیکەی توێژینەوەکەدا، پشکنینی مێشک بۆ 52 بەشداربوو ئەنجامدرا. توێژەران پەیوەندییەکیان لە نێوان کاردانەوەی مێتابۆلیک و ئەو ناوچانەی مێشک دۆزییەوە کە بەرپرسن لە حەز و خەڵاتکردن، ئەمەش ئەوە دەسەلمێنێت کە شێوازی ئامادەکردنی خۆراک کاریگەری لەسەر شێوازی هەڵسەنگاندنی مێشک بۆ خۆراک هەیە.
توێژەران جەخت دەکەنەوە کە پەیامی توێژینەوەکە ئەوە نییە ژماردنی کالۆری بێ سوودە، بەڵکو مەبەست ئەوەیە کە تەنیا ژماردنی کالۆری گەرەنتیی ئەوە ناکات جەستە بە هەمان شێوە کاردانەوەی هەبێت. ڕێگەی ئامادەکردنی خۆراک و پێکهاتەکەی، کاریگەرییەکی قوڵتری لەسەر کرداری زیندەپاڵ (میتابۆلیزم) هەیە.
لە کۆتاییدا، توێژەران ئامۆژگاری دەدەن کە نابێت خواردنی شەکر یان خواردنی ئامادەکراو بە شێوەیەکی پچڕپچڕ بە فەشەل دابنرێت، بەڵکو گرنگ ئەوەیە بەشێوەیەکی گشتی سەرنج لەسەر جۆری خۆراک و کەمکردنەوەی جۆرە زیانبەخشەکان بێت.
کۆمێنت (0)
تا ئێستا هیچ کۆمێنتێک نەکراوە.