سەرۆک بارزانی بە بۆنەی سەرکەوتنی کۆنگرەی یەکگرتنی یەکێتی لاوان و قوتابیانی کوردستان پەیامێکی پیرۆزبایی بڵاوکردەوە و رایگەیاند؛ "هیوادارم دەرئەنجامەكانی كۆنگرەكەتان ببێتە هۆی بەهێزتربوونی شێوازی كار و ڕێكخستنی قوتابیان و لاوان".
رۆژی هەینی 16ـی ئایاری 2025، سەرۆک مەسعود بارزانی لە راگەیەنراوێکدا بەبۆنەی سەرکەوتنی کۆنگرەی یەکگرتنەوەی یەکێتی قوتابیان و لاوان پەیامێکی بڵاوکردەوە و تیایدا پشتیوانیی خۆی بۆ "داواكاری و بەرنامە و ئامانجەكانیان" دووپات کردەوە.
دەقی پەیامی پیرۆزبایی سەرۆک بارزانی:
بەناوی خودای بەخشندە و میهرەبان
بەڕێزان سكرتێر و ئەندامانی مەكتەبی سكرتاریەتی یەكێتیی قوتابیان و لاوانی دیموكراتی كوردستان
بەبۆنەی سەركەوتنی كۆنگرەی یەكگرتنەوە و هەڵبژاردنتان وەك سكرتێر و ئەندامانی مەكتەبی سكرتاریەتی یەكێتیی قوتابیان و لاوانی دیموكراتی كوردستان پیرۆزباییەكی گەرم ئاراستەی ئێوە و سەرجەم قوتابی و لاوانی خۆشەویستی كوردستان دەكەم و هیوای سەركەوتنتان بۆ دەخوازم.
هیوادارم یەكگرتنەوەی قوتابیان و لاوان و دەرئەنجامەكانی كۆنگرەكەتان ببێتە هۆی بەهێزتربوونی شێوازی كار و ڕێكخستنی قوتابیان و لاوان و خزمەتی زیاتری دۆزی قوتابیان و لاوانی ئازیزی كوردستانی لێ بكەوێتەوە.
لەو بۆنەیەدا پشتیوانیی خۆم بۆ داواكاری و بەرنامە و ئامانجەكانتان دووپات دەكەمەوە و ئەو چاوەڕوانییە لە ئێوەی خۆشەویست هەیە لەژێر ڕۆشنایی هزر و بیری نیشتیمانپەروەرانە و بەپێی بەرنامە و پلانی ڕێكوپێك قوتابی و لاوی پێگەییشتوو و زیرەك و خاوەن ئیرادە و داهێنەر بۆ وڵاتەكەمان پێ بگەیێنن و هەردەم لە خزمەتی دۆزی ڕەوای گەلی كوردستاندا بن.
دووبارە پیرۆزباییتان لێ دەكەم و هەر لە سەركەوتن و پێشكەوتنی بەردەوامدا بن.
مسعود بارزانی
16ی ئایاری 2025
کۆمێنت (0)
تا ئێستا هیچ کۆمێنتێک نەکراوە.