رێبەر ئەحمەد له لووتكه‌ی ئاسایشی سنوور له له‌نده‌ن هۆكار و چارەسەرییەكانی كۆچی نایاسایی و بەرەنگاربوونەوەی دیاردەی قاچاخچێتی به مرۆڤی تاوتوێ کرد.
رۆژی هەینی 4ـی نیسانی 2025، رێبه‌ر ئه‌حمه‌د وەزیری ناوخۆی هەرێمی كوردستان له لووتكه‌ی ئاسایشی سنوور له له‌نده‌ن لە پانێڵی یەکەمی وەزیرانی چل دەوڵەت گوتاری هه‌رێمی كوردستانی پێشكه‌ش كرد.
وەزیری ناوخۆی هەرێمی کوردستان رایگەیاند؛ "هاووڵاتیانی هەرێمی کوردستان بۆ زەمەنێکی درێژ لەژێر جەور و ستەم ژیان و ناچار بە ئاوارەبوون و پەنابەری و بێلانەیی بوون، به‌ڵام له‌دوای رووخانی رژێمی دیکتاتۆری لە عێراق، دەرفەتێکی نوێ هاتە پێش و بینیمان کۆچی پێچەوانەی هاووڵاتییانی کوردستان دەستیپێکرد.
رێبەر ئەحمەد گوتی؛ "له‌دوای سه‌رهه‌ڵدانی داعش کۆچی پێچەوانە وه‌ستا و کوردستان بووەوە ناوچەی ئارامی باوەشکراوە بۆ ئەوانەی لە تۆقاندن و تیرۆری داعش ڕایان دەکرد. بە تایبەت بۆ کوردانی ئێزدی و مەسیحییەکان کە ببوونە ئامانجی پرۆسەکانی جینۆسایدکردن لەسەر دەستی گروپی تیرۆریستیی داعش، ئەوان کوردستانیان وەکوو پەناگە هەڵبژارد".
وەزیری ناوخۆی هەرێمی کوردستان دووپاتی دەکاتەوە: "گەڕانەوەی ئاشتییانە و سەربەرزانەی ئەوان بەهۆی بەردەوامیی نائارامی و هەبوونی میلیشیاکان و چەکدارانی پەکەکە لە شەنگال و دەشتی نەینەوا، بەربەستی رژدی بۆ دروست بووە" و وەکو ئاماژەشی پێدەدات: "حكومەتی هەرێمی كوردستان هه‌نگاوی بۆ سنوورداركردنی دەرفەتەكانی تاوانی قاچاخچێتی هاویشتووه، له‌وانه‌یش، دۆزینەوەی چارەسەر بۆ کێشە ئابوورییەکان لەڕێگەی هەمەچەشنکردنی سەرچاوەی داهات".
رێبەر ئەحمەد باسی لە هەماهەنگی لەگەڵ نووسینگەکانی گەشتیاری بۆ ڕێگریكردن لە مامەڵە و چالاکیی نایاسایی گەشتکردن کرد و "کەمپەینی هۆشیارکردنەوە لە مەترسی تۆڕەكانی بازرگانیكردن بەمرۆڤ بەتایبەت لە ڕێی سۆشیاڵ میدیا و هه‌روه‌ها کەمکردنەوەی پشتبەستن بە مامەڵەی کاش لەڕێی پرۆژەی (هەژماری من) و بەدیجیتاڵكردنی مامەڵە داراییەكان"ـی وەکو چارەسەرێک بۆ ئەم دیاردەیە ناو برد.
رێبەر ئەحمەد، وەزیری ناوخۆی هەرێمی کوردستان بە بانگهێشتی فەرمی وەزارەتی ناوخۆی بەریتانیا لە لووتكەی ئاسایشی سنوور لە لەندەن بەشدارە.
کۆمێنت (0)
تا ئێستا هیچ کۆمێنتێک نەکراوە.