سه‌رۆك مه‌سعود بارزانی په‌یامێكی بە بۆنەی حەفتاو دووهەمین ساڵیادی دامەزراندنی یەكێتی ئافرەتانی كوردستان بڵاوكرده‌وه.
ده‌قی په‌یامی سه‌رۆك بارزانی:
پەیامی سەرۆك بارزانی بە بۆنەی حەفتاو دووهەمین ساڵیادی دامەزراندنی یەكێتی ئافرەتانی كوردستان
بەناوی خودای بەخشندە و میهرەبان
به‌ڕێزان سكرتێر و ئه‌ندامانی مه‌كته‌بی سكرتاریه‌تی یه‌كێتی ئافره‌تانی كوردستان،
به بۆنه‌ی حەفتاودووهەمین ساڵیادی دامه‌زراندنی یه‌کێتی ئافره‌تانی کوردستان، پیرۆزبایی گه‌رم ئاراسته‌ی ئێوه و هه‌موو ئه‌ندامانی رێکخراوه تێکۆشه‌ره‌که‌تان و سەرجەم ئافرەتانی کوردستان ده‌که‌م.
یه‌کێتیی ئافره‌تانی کوردستان، یەكێكە لە دەستكەوتە گرنگەكانی شۆڕشی مەزنی ئەیلوول و لە هەمانكاتیشدا ئەزموونێكی سەركەوتووی بەشداریی ئافرەت لە ژیانی سیاسی و كۆمەڵایەتیی كوردستان بووە. یەكێتیی ئافرەتانی كوردستان رێکخراوێکی تێکۆشه‌ری ناو شۆڕش و خەباتی گەلی كوردستانە كە ڕۆڵی خۆی لە بڵاوكردنەوەی هۆشیاری و پێگەیاندنی ئافرەتان و بەرگریكردن لە مافەكانیان زۆر بە باشی بەجێ گەیاندووە و جێی پەنجەیان لە خەباتی ڕزگاریخوازی گەلی كوردستان هەمیشە دیارە.
ئەو چاوەڕوانییە لە یەكێتیی ئافرەتانی كوردستان هەیە كە لە قۆناغەكانی داهاتووی ژیانی گەلەكەماندا لە چوارچێوەی كولتووری پێكەوەژیان و مەدەنییەت و یەكسانی و نەهێشتنی توندوتیژیی خێزانی و كۆمەڵایەتی كار بۆ بەهێزكردنی هەستی نیشتیمانپەروەری لەنێو ڕیزەكانیاندا بكەن.
هیوای سەركەوتن و بەردەوامیتان بۆ دەخوازم.
مسعود بارزانی
11ی كانوونی یەكەمی 2024
کۆمێنت (0)
تا ئێستا هیچ کۆمێنتێک نەکراوە.