ئەمڕۆ دووشەممە بەسەرپەرشتى وەزیرى خوێندنى باڵا و توێژینەوەى زانستى، کۆبوونەوەیەک لەگەڵ یاریدەدەرانى سەرۆک زانکۆکان و بەڕێوەبەرى تۆمارى سەرجەم زانکۆ حکوومییەکانى هەرێمى کوردستان بەڕێوەچوو، لە کۆبونەوەکەدا پلان و ئامادەکارییەکانى وەزارەت تایبەت بە وەرگرتنى قوتابیان بۆ ساڵى خوێندنى (2024-2025) گفتوگۆى لەبارەوە کرا.
لە سەرەتادا د. ئارام محەمەد قادر وەزیرى خوێندنى باڵا هیواى سەرکەوتنى بۆ قوتابیانى قۆناغى دوانزەى ئامادەیی خواست کە لە ئێستادا لەنێو پرۆسەى تاقیکردنەوەکاندان، دواتر سوپاسى مامۆستایان و فەرمانبەرانى زانکۆکان و بەڕێوەبەرایەتى تۆمارى زانکۆکانى کوردستانى کرد بۆ ماندووبوون و شەونخونیان و خزمەتکردن بە نەوەى داهاتووى هەرێمەکەمان و سەرکەوتنى پرۆسەى وەرگرتن.
د. ئارام محەمەد قادر دووپاتی کردەوە ئامانج لەم کۆبوونەوەیە دانانى میکانیزم و پلان و ئامادەکارییە بۆ ساڵى نوێى خوێندن، بە شێوەیەک هاوتەریب بێت بۆ سوودى دەرچووان و پێداویستییەکانى بازاڕى کار.
گوتیشی: وەزارەتى خوێندنى باڵا بەڕەچاوکردنى کواڵتى خوێندن و لەچوارچێوەى جێبەجێکردنى پلانێکى تۆکمە، ئەمساڵیش زۆرترین دەرفەتى خوێندنى گشتى بۆ قوتابیان لە زانکۆ و پەیمانگەکان فەراهەم دەکات.
لەبارەى پرسى دارایى و بارودۆخى قوتابیان، وەزیرى خوێندنى باڵا ڕاگەیاند: بەهۆى داشکان لە کرێى خوێندن ساڵانە دەیان ملیار دینار بۆ خانەوادەى قوتابیان گەڕێنراوەتەوە، ئەمەش لەو پێناوەى پارە نەبێتە ڕێگر لەبەردەم بە دیهێنانى خەون و خولیاکانى گەنجانمان، بەڵێنیش دەدەین بە هەمان سیاسەت و ستراتیژ بەردەوام دەبین بۆ خزمەتکردن بە رۆڵەکانى وڵاتى خۆمان.
سەبارەت بە پرۆسەى گواستنەوە و دابەزین لەنێوان زانکۆکان کە لە داهاتوویەکى نزیکدا دەست پێ دەکات، وەزیرى خوێندنى باڵا و توێژینەوەى زانستى سەرجەم زانکۆکانى راسپارد بەو پەڕى لە خۆبوردووى و دڵسۆزییەوە، هاوکارى ئەو فێرخوازانە بکەن کە دەیانەوێت پرۆسەى گواستنەوە و دابەزین لەنێوان زانکۆکان ئەنجام بدەن بۆ ئەوەى لەنێو خانەوادەکانیان بتوانن درێژە بە خوێندن بدەن.
کۆمێنت (0)
تا ئێستا هیچ کۆمێنتێک نەکراوە.