نێرده‌ی ئه‌مه‌ریكا بۆ كاروباری یه‌مه‌ن سه‌ردانی سعوودییە و عومان ده‌كات

نێرده‌ی ئه‌مه‌ریكا بۆ كاروباری یه‌مه‌ن له‌باره‌ی هه‌ڕه‌شه‌ و چۆنییه‌تی کۆنتڕۆڵکردنی حوسییەکان، سه‌ردانی سعوودییە و عومان ده‌كات. 

له‌ راگه‌یه‌نداروێكدا وه‌زاره‌تی ده‌ره‌وه‌ی ئه‌مه‌ریكا رایگه‌یاند، تیم لاندەرکینگ، نوێنەری تایبەتی ئه‌مه‌ریكا بۆ کاروباری یەمەن، بە مەبەستی دانوستان لەگەڵ دەسەڵاتدارانی سعوودیه‌ و عومان سەبارەت بە به‌رده‌وامی هه‌ڕه‌شه‌ و کردەوەی ئەم دواییەی حوسییەکان لە دەستگیرکردنی ستافی نەتەوە یەکگرتووەکان و ڕێکخراوە مرۆییە نێودەوڵەتییەکان ، سه‌ردانی ڕیاز و مەسقەت ده‌كات. 

لە ناوەڕاستی ئه‌م مانگه‌دا، ملیشیاكانی  یه‌مه‌ن لە ئۆپەراسیۆنێکی هاوئاهەنگدا و به‌ تۆمه‌تی سیخوریكردن بۆ ئه‌مه‌ریكا زیاتر لە دەیان کارمەندی نەتەوە یەکگرتووەکان و ئه‌ندامانی ڕێکخراوە مرۆییە نێودەوڵەتییەکانیان دەستگیرکرد .

لە ڕاگەیاندراوەکەی وەزارەتی دەرەوەی ئەمریکادا هه‌روه‌ها هاتووە، یەکێک لە ئامانجەکانی دیكه‌ی سه‌ردانی لاندەرکینگ و شاندی یاوه‌ری  بۆ ڕۆژهەڵاتی ناوەڕاست، گفتوگۆکردنە لەگەڵ بەرپرسانی سعودیە و عومان سەبارەت بە هێرشە بێوچانەکانی حوسییەکان بۆ سەر کەشتییە نێودەوڵەتییەکان لە دەریای سوور و ئاوەکانی دەوروبەری.

 حكوومه‌تی عومان لە زۆرێک لە قەیرانە سیاسییەکانی نێوان ئێران و ئەمریکادا ڕۆڵی نێوبژیوانی گێراوه‌، هەر بۆیە پێدەچێت نوێنەری ئەمریکا بۆ کاروباری یەمەن لە سه‌ردانه‌كه‌یدا بۆ مەسقەت پەیامێكیش بۆ ده‌سه‌ڵاتدارانی ئێران وەک هاوپەیمانی حوسییەکان بنێرێت.