هەرئێك ژ بالیۆزێن ئه‌مریكا و بەریتانیا و ئەلمانیا ل عێراقێ سوپاسییا بزاڤێن سەرۆکێ هەرێما کوردستانێ دکەن ژبۆ دیاریکرنا رۆژا هەلبژارتنێن پەرلەمانا کوردستانێ و دبێژن هیڤیدارین هه‌لبژارتن نه‌هێنه پاشخستن.
ئه‌لینا رۆمانۆسكى بالیۆزا ئه‌مریكا ل عیراقێ ڕاگه‌هاند، ئەمەریکا پێشوازییێ ل ژڤانێ نوو یێ ئه‌نجام دانا هه‌لبژارتنێن گه‌را شه‌شێ یا په‌رله‌مانا كوردستانێ دكه‌ت. هەروەسا داخوازێ ژ حكومه‌تا هه‌رێما کوردستانێ دكه‌ت کو بێلایه‌نییا هه‌لبژارتنان گه‌ره‌نتى بكه‌ت. رۆمانوسكی هەروەسا سوپاسییا نێچیرڤان بارزانى سه‌رۆكێ هه‌رێما كوردستانێ كر ژبۆ وان بزاڤێن وى ژ پێخه‌مه‌ت دیاركرنا روژا ئه‌نجام دانا هه‌لبژارتنان کو بریارە ل رێككه‌فتی بیستی تشرینا ئێكێ یا ئەڤسالە بێهێنە ئەنجامدان.
ژلایەکێ دیڤە، ستیڤن هیچن، بالیۆزێ بریتانیا ل عیراقێ پێشوازى ل دیاركرنا ڕۆژا ئه‌نجامدانا هه‌لبژارتنان كر و دیاركر، پێدڤییه پرۆسه‌یا هه‌لبژارتنان یا شه‌فاف و هه‌مه‌لایه‌ن بیت بۆ به‌رده‌وامییا گه‌شه‌پێدان و سه‌قامگێرییێ ل هه‌رێما كوردستانێ.
ژلایێ خوە ڤە ژی بالیۆزخانه‌یا گشتییا ئه‌لمانیا ل هه‌رێما كوردستانێ ڕاگه‌هاند، پێشوازییێ ل دیاریکرنا ڕۆژا هه‌لبژارتنێن پەرلەمانێ کوردستانێ دكه‌ین و داخواز دکەین هه‌لبژارتنەکا گشتگیر برێڤەبچیت. هەروەسا داخواز ژی دکەت کو هه‌موو لایه‌نێن په‌یوه‌ندیدار، پشتراستییێ بده‌ن كو دێ هه‌لبژارتنەکا ئازاد و دادپه‌روه‌رانه هێتە ئەنجامدان.
کۆمێنت (0)
تا ئێستا هیچ کۆمێنتێک نەکراوە.