قاچاغچییەكانی یەختە ژێرئاوكەوتووەكەی ئیتاڵیا دەستگیركران

لە پارێزگای سلێمانی ئەو قاچاغچییانە دەستگیركران كە راستەوخۆ پەیوەندییان بە كەیسی ژێرئاوكەوتنی یەختەكەی ئیتاڵیا هەبوو كە ببووە هۆكاری گیانلەدەستدانی زیاتر لە 60 كەس.

ئاسایشی سلێمانی رایگەیاند: پاش بەدواداچوون و کۆکردنەوەی زانیاری لەسەر ئەو تۆمەتبارانەی دەستیان هەبووە لەناردنی ئەو هاووڵاتییانەی هەرێم بەڕێگەی قاچاغ بۆ کەناراوەکانی ئیتاڵیا، کە بووە هۆی ژێرئاوکەوتنی یەختەکەیان و گیانلەدەستدانی زیاتر لە 64 هاووڵاتی، بەفەرمانی دادوەری ئاسایش، ئەمڕۆ سێشەممە توانرا چوار تۆمەتباری گەورە قاچاغچی بازرگانیکردن بەمرۆڤەوە بەناوەکانی (ح، ح، ع ) و (ب، س، م) و (م، ج، أ) و(د، ع، س) دەستگیر بکەین.

راشیگەیاند: دڵنیایی دەدەینە هاووڵاتییانی هەرێمی کوردستان، هەوڵ و بەدواداچوونەکانمان بەردەوامە و لەئەنجامی لێکۆڵینەوەکان هەر کەسێکی تر ناوی بێت و بەشداربێت لە تاوانی بازرگانیکردن بە مرۆڤەوە لە ناوخۆ یان لە دەرەوەی هەرێم، دەستگیر دەکرێن و ڕووبەڕووی یاسا دەکرێنەوە.

ئاماژەی بەوەش دا كە ئێستا چوار تۆمەتبارەكە بە یاسای ژمارە (28)ی ساڵی 2012 دەستگیرکراون و لێکۆڵینەوە لە دۆسیەکانیان بەردەوامە.