بەهۆی خواردنی خراپ لە زەماوەندێكی هاوسەرگیریدا لە پارێزگای ئەنباڕ لە ناوەڕاستی عێراق، زیاتر لە 100 كەس ژەهراوی بوون و گەیەنرانە نەخۆشخانە.
شەوی رابردوو لە چوارەم رۆژی جەژنی قورباندا لە هۆڵێكی ئاهەنگگێڕان لە شارۆچكەی گەرما لە پارێزگای ئەنباڕ زەماوەندێكی هاوسەرگیری بەڕێوەچوو و خەڵكانێكی زۆر ئامادەی زەماوەندەكە بوون.
بەهۆی ئەو خواردنەی لە زەماوەندەكەدا بەسەر ئامادەبووان دابەش كرا، رێژەیەكی زۆر لە هاووڵاتییان تووشی ژەهراویبوون هاتن و تا بەرەبەیانی ئەمڕۆ زیاتر لە 100 ئامادەبووی زەماوەندەكە گەیەنرانە نەخۆشخانە.
فەرمانگەی تەندروستی ئەنباڕ رایگەیاند كە نەخۆشەكان تووشی ئازارێكی زۆری گەدە و سكچوو و رشانەوە ببوون و تەنانەت دۆخی تەندروستی هەندێكیان زۆر خراپ بوو.
راشیگەیاند كە خۆشبەختانە بەهۆی خواردنە خراپەكەوە هیچ كەسێك گیانی لەدەست نەداوە، بەڵام هەندێ لە نەخۆشەكان تا ئێستا لە نەخۆشخانە ماونەتەوە.
کۆمێنت (0)
تا ئێستا هیچ کۆمێنتێک نەکراوە.