كونسوڵی گشتیی به‌ریتانیا له هه‌ولێر رایگه‌یاند كه حكوومه‌تی وڵاته‌كه‌ی به‌هه‌موو شێوه‌یه‌ك پشتیوانی لێكتێگه‌یشتنی نێوان هه‌ولێر و به‌غدا ده‌كات بۆ چاره‌سه‌ركردنی كێشه‌كان و دابینكردنی شایسته داراییه‌كانی هه‌رێمی كوردستان له‌لایه‌ن عێراقه‌وه.
ئه‌مڕۆ دووشه‌م ئومێد سه‌باح سەرۆکی دیوانی ئەنجوومەنی وەزیرانی هه‌رێمی كوردستان پێشوازی لە خاتوو کەیت شو کۆنسوڵی گشتیی وڵاتی بریتانیا لە هەولێر بە وەکالەت و شاندێکی یاوەری کرد.
لە دیدارەکەدا وێڕای بەخێرهێنانی شاندی میوان، پەیوەندی و هەماهەنگی بەردەوام و لەمێژینەی نێوان بریتانیا و هەرێمی کوردستان بەرز نرخێنرا.
هه‌روه‌ها تاوتوێی دوایین گۆڕانکاری و پەرەسەندنەکانی نێو گۆرەپانی سیاسی عێراق و هەرێمی کوردستان کران، دوایین سەردانی شاندی حکوومەتی هەرێم و بڕینی هەنگاوی باش لە گفتوگۆکاندا سەبارەت بە هەمواری پڕۆژە یاسایی بودجەی ئیتیحادی و دابینکردنی ماف و شایستە داراییەکانی لەلایەن عێراقەوە و پرسی دەستپێکردنەوەی هەناردەی نەوت، تەوەرێکی تری کۆبوونەوەکە بوو.
لای خۆیەوە کونسوڵی بریتانیا پشتیوانی حکوومەتی بریتانیای بۆ دوایین لێکتێگەیشتن و گفتوگۆکانی نێوان حکوومەتی هەرێم و حكوومه‌تی فیدڕالی دووپاتکردەوە.
هەر لە کۆبوونەوەکەدا، سەبارەت بە پرسی هەڵبژاردنی پەرلەمانی کوردستان ئاماژە بەوە درا کە حکوومەتی هەرێمی کوردستان پاڵپشتی ئەنجامدانی هەڵبژاردنی پەرلەمانی کوردستانە.
کۆمێنت (0)
تا ئێستا هیچ کۆمێنتێک نەکراوە.