دوو برای وەرزشکاری خەڵکی بۆکان، بە ناوه‌كانی سامان جەلیلی 34 ساڵ و بێهنام جەلیلی 30 ساڵ، سێ هەفتەی پێش، لەلایەن هێزە ئەمنییەکانەوە دەستبەسەرکراون و لەبارەی شوێنی ڕاگیران و چارەنووسیان هیچ زانیارییەک لەبەردەستدا نییە. هێزە ئەمنییەکان پێش دەستبەسەرکردنیان ئەم دوو برایەیان داوەتە بەر لێدان و کوتان.
بەگوێرەی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی سێشەممە، 4 ی 10 ی 2022، ژمارەیەکی زۆری هێزەکانی ئیدارەی ئیتلاعاتی شاری بۆکان، هێرشیان کردووەتە سەر یانەی وەرزشیی ئەم دوو برایە و بە دروستکردنی کەشێکی تۆقێنەر ئەم دوو هاووڵاتییەیان دەستبەسەر کردووە.
سەرچاوەیەکی ئاگادار لەمبارەوە بە هەنگاوی ڕاگەیاند: هێزەکانی ئیدارەی ئیتلاعات لە کاتی دەستبەسەرکردنی ئەو دوو برایە، کە وەرزشکاری پارکوورن، بە باتۆم و پەنجە بۆکس لەو دوو برایەیان داوە.
ئەم سەرچاوە لە درێژەدا ڕایگەیاند: ئەو هێزانەی سەر بە ئیدارەی ئیتلاعات، زۆرێک لە کەلوپەلەکانی یانەی ئەوو برایەیان شکاندووە.
لەدوای تێپەڕینی سێ هەفتە بەسەر دەستبەسەرکرانی ئەو دوو برا وەرزشکار و ناسراوانەی خەڵکی بۆکان و سەرەڕای بەدواداچوونەکانی بنەماڵەکانیان هیچ زانیارییەک لەبارەی چارەنووس و شوێنی دەستبەسەرکرانیان لەبەردەستدا نییە.
یەکێک لە نزیکانی بنەماڵەی جەلیلی لەمبارەوە بە هەنگاوی ڕاگەیاند، کە هۆکاری دەستبەسەرکرانی ئەم دوو برایە پشتیوانییەکانیان لە ناڕەزایەتی و خۆپیشاندانەکانی ئەم دوایەی خەڵک لە دژی کوژرانی ژینا ئەمینی لە تۆڕە کۆمەڵایەتییەکان بووە.
کۆمێنت (0)
تا ئێستا هیچ کۆمێنتێک نەکراوە.