ئینته‌رمیلان سه‌رکه‌وتنی به‌سه‌ر شێریف تیراسپۆل تۆمارکرد

لە  گەڕی چوارەمی قۆناغی كۆمەڵەكانی چامپیۆنس لیگ و لە هەمان گڕوپی خولەكەدا، یانەی ئینتەرمیلان سەركەوتنێكی گرنگی لە دەرەوەی یاریگای خۆی بەدەستهێناو بە سێ‌ گۆڵ بەرامبەر بە گۆڵێك لە یانەی شێریف تیراسپۆلی مۆلدۆڤی میوانداری بردەوە.
 دوای تەواوبوونی گێمی یەكەمی یاریەكە بە یەكسان بوونی هەردوو تیپ بێ‌ گۆڵ، لە گێمی دووەم و لە خولەكی پەنجاوچواردا، مارسێلۆ برۆزۆڤیچی كڕواتی گۆڵێكی بۆ ئینتەرمیلان تۆماركرد.
پاشان میلان سكرینیاری سلۆڤاكی گۆڵی دووەمی تیپی میوانی لە خولەكی شەستوشەش بەدەستهێنا، لە خولەكی هەشتاودووشدا، ئەلێكسیس سانچێزی چیلی میوانەكانی كردە خاوەنی گۆڵی سێیەم، لەو لاشەوە هێرشبەری مالی ئاداما تراورێ‌ تاكە گۆڵی شێریف تیراسپۆلی لە دواساتەكانی یاری تۆماركرد.
 بەم بردنەوەش كۆی خاڵەكانی ئینتەمیلان لە پلەی دووەمی ڕیزبەندی گڕوپی چوارەم بۆ حەوت خاڵ بەرزبووەوەو شێریف تیراسپۆلیش بە شەش خاڵ لە پلەی سێیەمی ڕیزبەندی گڕوپەكە دێت.