به‌رپرسی لقی شنگالی پارتی دیموكراتی كوردستان رایده‌گه‌ێنێت: له شنگال په‌كه‌كه و حه‌شد خروقاتیان كردووه و به هێزی چه‌كداره‌وه له خانه‌سۆر و چه‌ند ناوچه‌یه‌كی دیكه ڕێگرییان له ده‌نگده‌ران كردووه و هه‌ڕه‌شەیان لێ كردوون.
ئاشتی كۆچه‌ر، به‌رپرسی لقی شنگالی پارتی دیموكراتی كوردستان به ده‌زگاكانی راگه‌یاندنی راگه‌یاند: ئه‌مڕۆ یه‌ك شه‌ممه 10 ى 10 ى 2021 ، چه‌كدارانی په‌كه‌كه و حه‌شد به هه‌ماهه‌نگیی یه‌كتری و به هێزی چه‌كدار و میلیشیا و خه‌ڵكی ده‌ماكداره‌وه كه له سووریاوه هێنراون، ڕێگرییان له ده‌نگده‌رانی پارتی کرد و هه‌ڕه‌شه‌یان لێ کردن، به‌ڵام زوو به‌غدامان له‌و پێشێلكارییه ئاگادار كرده‌وه و لایه‌نگرانی پارتییش ته‌حه‌دای په‌كه‌كه‌یان كرد و ده‌نگیان دا.
راشیگه‌یاند: ئه‌م ڕێگرتنەی په‌كه‌كه به فه‌رمانی قه‌ندیل بووه بۆ ئه‌وه‌ی به‌ربژێرانی پارتی له‌وێ ده‌نگ نه‌هێنن و خه‌ڵكیان له سووریاوه هێناوه بۆ سنوونێ و خانه‌سۆر کە به چه‌كه‌وه به‌رده‌م قوتابخانه‌كانیان گرتبوو و به‌شێك له گه‌نجانی جوانی شۆڕش، كه گرووپێكی خۆیانن، له‌وێ جێگیریان كردبوون و ئێستاش دوای هه‌وڵه‌كانمان بۆ شكایه‌ت و تۆماركردنی سكاڵا دۆخه‌كه ئارام بووه‌ته‌وه.
کۆمێنت (0)
تا ئێستا هیچ کۆمێنتێک نەکراوە.