دەنگدانی گشتی دەستیپێکرد

هەر ئێستا دەنگدانی گشتی بۆ ھەڵبژاردنی پێشوەختەی ئەنجوومەنی نوێنەرانی عێراق دەستیپێکرد.

کاتژمێر 7:00ـی بەیانی ئەمڕۆ یەکشەممە 10ـی تشرینی یەکەمی 2021، پڕۆسەی دەنگدانی گشتی دەستیپێکرد و بڕیار وایە تاوەکوو کاتژمێر 6:00ـی ئێوارە پڕۆسەکە بەردەوام بێت.

بەپێی داتاکانی کۆمسیۆنی باڵای سەربەخۆی ھەڵبژاردنەکانی عێراق، ئەمڕۆ 23 ملیۆن و 986 هەزار و 741 هاووڵاتی لە سەرتاسەری عێراق مافی دەنگدانیان هەیە و 3243 کاندید ڕکابەری لەسەر 329 کورسی دەکەن لە 83 بازنەی جیاوازدا.

ھەر بەپێی داتاکانی کۆمسیۆنی باڵای سەربەخۆی هەڵبژاردنەکانی عێراق لە پارێزگای هەولێردا زیاتر لە 1 ملیۆن و 228 هەزار هاووڵاتی مافی دەنگدانییان هەیە لە چوارچێوەی چوار بازنەدا، بەپێی یاسای ژمارە 9ـی ساڵی 2020ـی هەڵبژاردنی ئەنجوومەنی نوێنەرانی عێراق، پارێزگای هەولێر دابەشکراوە بەسەر چوار بازنەدا و 15 کورسی گشتی و 1 کورسی کۆتای مەسیحییەکانی بۆ تەرخانکراوە.

بەپێی ھەمان داتا، لە پارێزگای دهۆک زیاتر لە 827 هەزار هاوڵاتی مافی دەنگدانییان هەیە و دابەشکراوە بۆ 3 بازنە و 11 کورسی بۆ پارێزگاکە تەرخانکراوە.

ھەروەھا لە پارێزگای سلێمانی زیاتر لە 1 ملیۆن و 360 هەزار هاوڵاتی مافی دەنگدانی هەیە، پارێزگاکە دابەشکراوە بەسەر 5 بازنەدا و بەربژێرەکان ڕکابەری دەکەن بۆ بەدەستھێنانی کورسیێک لە کۆی 18 کورسی کە لە پەرلەمانی عێراق بۆ بەربژێرەکانی پارێزگاکە تەرخانکراوە.

لە پارێزگای کەرکووکیشدا، 1 ملیۆن  و 75 هەزار 510 هاووڵاتی مافی دەنگدانی هەیە، دابەشکراوە بەسەر 3 بازنەدا، 12 کورسیش بۆ پارێزگای کەرکووک لە پەرلەمانی عێراق تەرخانکراوە.

شایەنی باسە، ھەڵبژاردنی ئەمجارەی عێراق جیاوازە لە ھەڵبژاردنەکانی پێشوو، بەھۆی ئەوەی لە ژێر چاودێری نەتەوە یەکگرتووەکان پڕۆسەکە بەڕێوەدەچێت و ھەوڵ دەدرێت ڕێگە بگرن لە ھەر جۆرە ساختەکاریێک.