سوپای عێراق پووچەڵکردنەوەی دوو ھەوڵی بۆ تەقاندنەوەی تاوەرەکانی گواستنەوەی کارەبا لە پارێزگاکانی نەینەوا و دیالە راگەیاند.
شانەی راگەیاندنی ئەمنیی سەربە فەرماندەیی ئۆپەراسیۆنە ھاوبەشەکانی عێراق لە راگەیەنراوێکدا ئاماژەی بەوەداوە، ژمارەیەک بۆمب کە لەژێر ژمارەیەک تاوەرەی گواستنەوەی کارەبا لە پارێزگاکانی نەینەوا و دیالە چێندرابوون، لەلایەن ھێزە ئەمنییەکانەوە پووچەڵکراونەتەوە.
باس لەوەشکراوە کە ھێزە ئەمنییەکان و حەشدی شەعبی بەردەوام چاودێری ھێڵەکانی گواستنەوەی کارەبا لە ناوچەکانی عێراق دەکەن و تەواوی ھەوڵەکانیان بە ئامانجی پاراستنی تاوەرەکانی گواستنەوەی کارەبا خستووەتەگەڕ.
ئەمەیش لە کاتێکدا لە ماوەکانی رابردوودا، ژمارەیەک تاوەری گواستنەوەی کارەبای نیشتمانیی لە پارێزگاکانی دیالە و کەرکووک، سەڵاحەددین و نەینەوا کرانە ئامانج کە ئەوەیش کاریگەریی لەسەر کەمبوونەوەی کاتژمێرەکانی پێدانی کارەبای نیشتمانیی بە ھاووڵاتییان دروستکردووە.
کۆمێنت (0)
تا ئێستا هیچ کۆمێنتێک نەکراوە.