چوارشه‌ممه‌ حکومەت ‌و پەرلەمان و کۆمیسیۆن بۆ دیاریکردنی رۆژی هەڵبژاردن کۆدەبنەوە

ئومێد خۆشناو، سەرۆكی فراكسیۆنی پارتی لە پەرلەمانی كوردستان رایگەیاند، بڕیارە ئەم چوارشەممەیە 7-2-2018، سەرۆكایەتیی حكومەت ‌و پەرلەمان ‌و كۆمیسیۆنی باڵای هەڵبژاردن و راپرسیی هەرێمی كوردستان بۆ دیاریكردنی رۆژی هەڵبژاردن كۆببنەوە.

سەرۆكی فراكسیۆنی پارتی ئاماژەی بەوە کرد کە لە کۆبوونەوەکەدا سەرۆک فراکسیۆنەکانیش بەشداردەبن، تێیدا گفتوگۆ لەبارەی ئاسته‌نگەكانی بەردەم هەڵبژاردن ‌و پاكکردنەوەی تۆماری دەنگدەران دەكرێت، رۆژی هەڵبژاردنیش دیاری دەكرێت.

پێشتر كۆمیسیۆنی هەڵبژاردنی كوردستان وادەیەکی 45 رۆژی بۆ پاكردنەوەی لیستی تۆماری دەنگدەران دیاریكردبوو، هەرچەندە رۆژی 11-1- 2018 وادەکە كۆتاییهات، بەڵام  تاوەكو ئێستا كۆمیسیۆن ئەنجامی پاكکردنەوەی تۆماری دەنگدەرانی رانەگەیاندووە. 

لایەنە سیاسییە جیاوازەكان پێشبینی دەكەن زیاتر لە 100 هەزار ناوی زیادە‌ و دووبارە ‌و مردوو لە لیستی تۆماری دەنگدەرانی هەرێمی كوردستاندا هەبن. كۆمیسیۆن بڕیاریداوە بۆ هەڵبژاردنی داهاتووی هەرێمی كوردستان تەواوی لیستی تۆماری دەنگدەران پاكبكاتەوە. مەرجی بەشداری بەشێك لەلایەنەكانیش بۆ هەڵبژاردن پاكکردنەوەی تۆماری دەنگدەرانە.