جێگری سه‌رۆكی كۆماری عێراق،رایده‌گه‌ێنێ، ته‌داخولی ئێران بۆ كوردستان كارێكی هه‌ڵه‌یه، چونكه خۆی تووشی كێشه‌ی نێوده‌وڵه‌تی ده‌كات ، به‌تایبه‌تی له‌م كاته‌دا كه چاودێرییه‌كی زۆری له‌سه‌ره.
ئه‌یاد عه‌لاوی، جێگری سه‌رۆكی كۆماری عێراق له به‌رنامه‌یه‌كی ته‌له‌فزیۆنی سكای نیوزدا رایگه‌یاند: مه‌سعود بارزانی، سه‌رۆكی هه‌رێمی كوردستان ، بۆیه په‌نای بۆ ڕیفراندۆم برد، چونكه حكومه‌تی شه‌راكه‌تی نیشتیمانی جێ به‌جێ نابێت و حكومه‌تی عێراق و مافی كوردستان نادات.
هه‌روه‌ها گوتی: سه‌رۆك بارزانی دوای ڕیفراندۆم نامه‌ی بۆ ناردووم ، كه دووساڵ ڕیفراندۆم سڕ بكات ، نامه‌كه‌م كۆپی كرد ، زۆر نامه‌كه‌یم به‌لاوه ئیجابی بوو ، كۆپییه‌كم نارد بۆ سكرتێری گشتی نه‌ته‌وه یه‌كگرتووه‌كان و عه‌بادی و سكرتێری گشتی كۆمكاری عه‌ره‌بی .
گوتیشی: ئێمه زوو كه ئۆپۆزیسیۆن بووین به‌ڵێنمان داوه كه فشار و چه‌ك به‌كار نه‌هێنین دژی یه‌كدی ، به‌ڵام ئه‌وه‌ی ئێسته ڕوو ده‌دات ته‌داخولاتی ئێرانه‌و به جوانی ده‌بینرێت.
عه‌لاوی ئاشكراشیكرد، قوباد تاڵه‌بانی كه كوڕی خوالێیخۆشبێت مام جه‌لاله‌و ئه‌ندامی مه‌كته‌بی سیاسی یه‌كێتییه ، ته‌له‌فۆنی بۆ كردم و پێی گوتم ، ئێران له‌ڕێگه‌ی قاسمی سلێمانییه‌وه فشاری زۆرمان لێ ده‌كات كه جیا بینه‌وه له پارتی و دوو له‌ت بین ، به‌ڵام قوباد گوتی : ئێمه ره‌تمان كردۆته‌وه و گوتوومانه ئێمه‌و پارتی یه‌كین ، جیا نابینه‌وه له هه‌ڵویسته‌كانی پارتی ، شه‌ڕ بێت یان ئاشتی .
عه‌لاوی له‌سه‌ر زاری سه‌رۆك بارزانییه‌وه ده‌ڵێ: ئێران به‌سه‌رپه‌رشتی قاسمی سلێمانی به‌ته‌واوی به‌شداره له‌و هێرشه‌دا كه كراوه‌ته سه‌ر شاری كه‌ركوك، به‌ڵگه‌ی ڤیدیۆیی له‌به‌ر ده‌سته.
ده‌شڵێ: ته‌داخولی ئێران بۆ كوردستان كارێكی هه‌ڵه‌یه، چونكه خۆی تووشی كێشه‌ی نێوده‌وڵه‌تی ده‌كات ، به‌تایبه‌تی له‌م كاته‌دا كه چاودێرییه‌كی زۆری له‌سه‌ره.
عه‌لاوی ئه‌وه‌شی ئاشكراكردووه كه قوباد تاڵه‌بانی پێی گوتووه، ئێمه چاره‌سه‌ری عێراقییانه‌و نیشتمانیانه‌ی دوولایه‌نه‌مان ده‌وێت , به‌بێ به‌شداری و ته‌داخول كردنی ئێران.
رزگارتاهیر
کۆمێنت (0)
تا ئێستا هیچ کۆمێنتێک نەکراوە.