فەرمانگەی کارەبای سیدەکان ڕایگەیاند، دوای چەند ڕۆژێک لە پچڕانی بەهۆی لافاو و خراپیی کەشوهەوا، تیمەکانی چاککردنەوە توانییان کارەبا بۆ گوندەکانی سنووری دەشتی هێرت بگەڕێننەوە.
ڕۆژی چوارشەممە 29ـی نیسان، فەرمانگەی کارەبای سیدەکان ڕاگەیەندراوێکی بڵاو کردەوە و تێیدا هاتووە: "دوای ئەوەی لە چەند ڕۆژی ڕابردوودا بەهۆی بارانبارین و دروستبوونی لافاو لە گوندەکانی سنووری (دەشتی هێرت)، زیانێکی زۆر بە تۆڕەکانی کارەبا گەیشت و چەندین ستوونی کارەبا کەوتن، ئەمڕۆ تیمەکانمان سەرکەوتووانە کارەبایان بۆ گوندەکانی (ئاڵەکان، خەلیفان و سیران) گەڕاندەوە".
بەپێی ڕاگەیەندراوەکە، بەهۆی تێکچوونی ڕێگەوبان و پردەکانەوە، تیمەکانی چاککردنەوە تووشی ئاستەنگی زۆر ببوون، بەڵام بە هاوکاریی قایمقامیەتی شارۆچکەی سیدەکان ڕێگاکان چاککراون و ڕێڕەوی نوێ بۆ دانانەوەی ستوونەکان دابین کراوە.
فەرمانگەی کارەبای سیدەکان ئاماژەی بەوەش کردووە، سەرەڕای نالەباری کەشوهەوا و سەختیی ناوچەکە، تیمەکانیان توانیویانە هەموو ستوونەکان دابنێنەوە و تۆڕەکە بخەنەوە گەڕ.
کۆمێنت (0)
تا ئێستا هیچ کۆمێنتێک نەکراوە.