ئەمڕۆ پێنجشەممە، ئالان حەمەسەعید، وەزیری پەروەردەی حکوومەتی هەرێمی کوردستان، بڕیاری یەکخستنی جلوبەرگی ناوەندەکانی خوێندنی ڕاگەیاند و جەختی کردەوە کە دایکوباوکان ئازادن لەوەی جلوبەرگی منداڵەکانیان لە هەر شوێنێک بکڕن کە بۆیان گونجاو بێت.
بەپێی بڕیارە نوێیەکە، جلوبەرگی قوتابخانە حکوومی، نێودەوڵەتی، نموونەیی و کۆمەڵگە پەروەردەییەکان هاوشێوە دەبن و هیچ ناوەندێکی خوێندن مافی ئەوەی نییە گرێبەست لەگەڵ کۆمپانیا یان دوکاندارێک بکات بۆ ئەوەی بە زۆر جلوبەرگ بەسەر قوتابیاندا بفرۆشێتەوە.
ڕەنگی جلوبەرگەکان بەپێی قۆناغەکان بەم شێوەیە دەبێت:
- باخچەی ساوایان: تیشێرتی نارنجی و پانتۆڵی نیلی.
- قۆناغی 1 تا 6 ی بنەڕەتی: تیشێرتی مارۆنی لەگەڵ پانتۆڵ یان تەنورەی نیلی.
- قۆناغی 7 تا 9 ی بنەڕەتی: تیشێرتی نیلی و پانتۆڵ یان تەنورەی ڕساسی.
- قۆناغی 10 تا 12 ی ئامادەیی: تیشێرتی ڕساسی و پانتۆڵ یان تەنورەی ڕەش.
لەبارەی کوالێتی و جۆری قوماشەکەوە، وەزارەتی پەروەردە مەرجی داناوە، بۆ تیشێرت و بلوز دەبێت ڕێژەی کەتان لە 70% کەمتر نەبێت و کێشەکەی 210 گرام بێت بۆ هەر مەتر مورەبەعێک. بۆ پانتۆڵ و تەنورەش دەبێت 50% کەتان و 47% پۆلیستەر بێت و کێشەکەی 270 گرام بێت.
هاوکات ئاماژە بەوە دراوە کە پۆشینی قەمسەڵە و جلوبەرگی وەرزشی ئازادە، بەو مەرجەی ڕەنگەکانیان لەگەڵ ڕەنگی جلوبەرگی قوتابخانەکاندا بگونجێت. وەزارەتی پەروەردە ڕاشیگەیاند، کەتەلۆگی تایبەت بە شێواز و کوالێتی جلوبەرگەکان ئامادەکراوە و بازرگانان دەتوانن بەخۆڕایی لە بەڕێوەبەرایەتییە گشتییەکان وەریگرن، تاوەکو بەپێی ئەو ستانداردانە جلوبەرگ بخەنە بازاڕەوە و ڕێگری لە بارگرانی دارایی بۆ سەر شانی هاووڵاتییان بکرێت.
کۆمێنت (0)
تا ئێستا هیچ کۆمێنتێک نەکراوە.