بەڕێوەبەرایەتیی گشتیی کەشناسی و بوومەلەرزەزانیی حکوومەتی هەرێمی کوردستان، پێشبینییەکانی کەشوهەوای 48 کاتژمێری داهاتووی خستەڕوو و ڕایگەیاند، کاریگەریی ئەو شەپۆلە بارانبارینەی ڕووی لە ناوچەکە کردووە، بۆ ئەمڕۆ یەکشەممە بەردەوامی دەبێت.
بەپێی ڕاگەیەندراوەکەی کەشناسی، لە ئێستادا ئاسمانی زۆربەی ناوچەکان هەورە و پێشبینی دەکرێت لە کاتەکانی دوای نیوەڕۆدا شەپۆلەکە چالاک ببێتەوە. بارانبارین بە شێوەی لێزمەباران و هەورە تریشقە دەبێت و لە هەندێک کاتدا ئەگەری تەرزەبارین هەیە.
ئاستی دابارین لە سنووری پارێزگای هەولێر (بەتایبەت ناوچە شاخاوییەکان و دەوروبەری کۆیە)، ئیدارەی سۆران، مێرگەسوور، ڕۆژهەڵاتی دهۆک (ئاکرێ، دینارتە، بجیل، زاویتە) و سنووری پارێزگای سلێمانی و ئیدارە سەربەخۆکانی، زیاتر دەبێت.
کەشناسی ئاماژەی بەوە کردووە کە سبەی بەیانی ئاسمان نیمچە هەور دەبێت، بەڵام لە دوای نیوەڕۆوە دووبارە کەشوهەوا ناجێگیر دەبێتەوە. کاریگەریی شەپۆلەکە لە سنووری پارێزگای دهۆک و ناوچە شاخاوییەکانی زیاتر دەبێت. هەروەها لە پارێزگاکانی هەولێر، سلێمانی، کەرکووک و هەڵەبجە ئەگەری تاوەبارانی بەهاری و هەورە تریشقە لە کات و شوێنی جیاجیادا هەیە.
بەرزترین پلەکانی گەرما بۆ سبەی دووشەممە بە پلەی سیلیزی:
هەولێر: 24
سلێمانی: 25
دهۆک: 23
کەرکووک: 26
هەڵەبجە: 24
زاخۆ: 24
سۆران: 22
گەرمیان: 26
پیرمام: 23
حاجی ئۆمەران: 18
کۆمێنت (0)
تا ئێستا هیچ کۆمێنتێک نەکراوە.