پەرلەمانی عێراق بڕیاری دا ئەو چوار پڕۆژەیاسایەی كە بڕیاربوو ئەمڕۆ یەكشەممە دەنگیان لەسەر بدرێت، بۆ كاتێكی دیكە دوابخرێت.
ئەمڕۆ یەكشەممە پەرلەمانی عێراق بە ئامادەبوونی 172 ئەندام كۆبووەوە بۆ تاوتوێكردن و دەنگدان لەسەر چەند پڕۆژەیاسایەك.
گرینگترین ئەو پڕۆژەیاسایەی كە بڕیار بوو ئەمڕۆ یەكشەممە دەنگی لەسەر بدرێت بریتی بوو لە پڕۆژەیاسای گەڕانەوەی خاوەندارێتی زەوی و موڵك بۆ خاوەنەكانیان و هەڵوەشاندنەوەی بڕیارەكانی رژێمی بەعسی پێشوو كە لەنێوان ساڵانی 1975 بۆ 1979 دەری كردبوون دژی جوتیارانی كورد لە كەركووك و ناوچە كوردستاییەكانی دەرەوەی ئیدارەی هەرێمی كوردستان.
پەرلەمانی عێراق هەروەها بڕیار بوو ئەمرۆ یەكشەممە دەنگ لەسەر هەمواری یاسای باری كەسێتی ساڵی 1959، هەمواری دووەمی یاسای لێبوردنی گشتی و پڕۆژەیاسای خزمەت و خانەنشینی حەشدی شەعبی بدات.
بەهۆی دروستبوونی ئاڵۆزی لەنێو هۆڵی پەرلەمان و رێكنەكەوتنی لایەنەكان، موحسین مەندەلاوی سەرۆكی ئەنجوومەنی نوێنەرانی عێراق بە وەكالەت، بڕیاری دا پڕۆسەی دەنگدان لەسەر هەرچوار پڕۆژەیاساكە بۆ كاتێكی دیكە دوابخات.
کۆمێنت (0)
تا ئێستا هیچ کۆمێنتێک نەکراوە.