نیوەڕۆی ئه‌مڕۆ پێنجشه‌ممه ئومێد خۆشناو پارێزگاری هه‌ولێر لەپێناو پتر خزمەتکردنی هاووڵاتییان و ڕاییکردنی کاروبارەکانیان، لە دیوانی پارێزگا لە کۆنگرەیەکی ڕۆژنامەوانیدا 2 خزمەتگوزاریی خێرای بۆ راییكردنی کاروباری هاووڵاتییان له فه‌رمانگه حكوومییه‌كان ڕاگەیاند.
ئومێد خۆشناو رایگەیاند: له سۆنگه‌ی جێبه‌جێكردنی كارنامه‌ی حكوومه‌تی هه‌رێمی كوردستان و دیدگا و بۆچوونی جەنابی سه‌رۆك وه‌زیران مه‌سرور بارزانی و له‌پێناو كه‌مكردنه‌وه‌ی رۆتین و رێزگرتن له هاووڵاتی و به‌ڕێوه‌چوونی كاروباره‌كانیان به شێوه‌یه‌كی دروست و خێرا، له سنووری پارێزگای هه‌ولێر 2 خزمه‌تگوزاریی خێرا کەوتۆتە کار و لەمڕۆوە هاووڵاتییان دەتوانن له رێگەی ئەم دوو خزمەتگوزارییەوە سكاڵا و داواكارییه‌كانیان بگه‌یەنن.
راشیگەیاند: یەکێک لەو خزمەتگوزارییە ژمارە تەلەفۆنی (07506000707) کە له‌نێو دیوانی پارێزگا دابینکراوە و په‌یوه‌ندیی هاووڵاتییان وه‌ردەگیرێت و داواكارییەکان تۆمار ده‌كات و ده‌نگیان ده‌گه‌یه‌نێته لایەنە په‌یوه‌ندیداره‌كان و چاره‌سه‌ری گونجاو و خێرا بۆ خواستەکانیان دەكرێت.
هەروەها گوتی: خزمه‌تگوزاری دووه‌م، بریتیه له (eService) ئه‌ویش له ماڵپه‌ڕی فەرمی پارێزگای هه‌ولێرە (www.hawlergov.org)، لەو خزمەتگوزارییەش هاووڵاتی ڕاستەوخۆ ده‌توانێ مامه‌ڵه و سكاڵا و داواكارییه‌كانی بگه‌یه‌نێ و لە زووترین کاتدا وه‌ڵامی خواست و داواکارییەکانی ده‌درێته‌وه.
پارێزگاری هەولێر ئاماژەی بەوەش دا كە حكوومه‌تی هه‌رێمی كوردستان خزمه‌تكاری خه‌ڵكی كوردستانه و هیچ به‌ربه‌ستێك له‌نێوان هاووڵاتی و حكوومه‌تدا نییه. جەختیشی كردەوە كە له رێگه‌ی ئه‌م ژماره مۆبایله و خزمەتگوازرییەی لە ماڵپه‌ڕی فه‌رمی پارێزگا دابینکراو، ماوه و كاتی خه‌ڵك بۆ راییبوونی مامه‌ڵه‌كانیان كورت ده‌كرێته‌وه.
سەبارەت بە ئامادەکارییەكان بۆ جه‌ژنی قوربانی پیرۆز، ئومێد خۆشناو گوتی: له‌پێناو سه‌لامه‌تی و خۆپارێزی له تای خوێنبه‌ربوون، تەواویی رێنمایی و رێككاره‌كانی وه‌زاره‌تی ته‌ندروستی جێبەجێ دەکرێت و لەلایەن سەرجەم لایەنە پەیوەندیدارەکانیش ئاماده‌كاریی بۆ به‌ڕێوه‌چوونی پرۆسه‌ی قوربانیكردن كراوه.
ئاماژەشی دا كە له رۆژانی پشوو و جه‌ژن لە بازگەکانی سنووری پارێزگای هەولێر به شێوه‌یه‌كی دروست پێشوازی له گه‌شتیاران ده‌كرێت و هەموو ئاسانكارییەکیان پێشکەش ده‌كرێت. گوتیشی كە خواستی ئەوان ئەوەیە گه‌شتیاران پشووێكی خۆش له هه‌ولێر به‌سه‌ر ببه‌ن.
کۆمێنت (0)
تا ئێستا هیچ کۆمێنتێک نەکراوە.