وەزیری دارایی و ئابووری حكوومەتی هەرێمی كوردستان پیرۆزبایی دەستبەکاربوون لە بەڕێوەبەری نوێی ژمێرکاری وەزارەت كرد و لە كۆبوونەوەیەك لەگەڵیدا داوای كرد هەموو کارئاسانییەک بۆ ڕایکردنی مامەڵەی هاووڵاتییان لەو بەڕێوبەرایەتییەدا بکرێت.
ئەمڕۆ سێشەممە ئاوات شێخ جەناب وەزیری دارایی و ئابووری سەردانی بەڕێوبەرایەتی گشتیی ژمێرکاری کرد و پشتیوانی خۆی بۆ کۆڤان عیزەت بەڕێوەبەری نوێی بەڕێوبەرایەتییەکە دووپات کردەوە.
وەزیری دارایی ڕایگەیاند كە بەڕێوەبەرایەتی ژمێرکاری یەکێکە لە بەڕێوەبەرایەتییە گرنگەکانی وەزارەتی دارایی و کاری زۆر و گرینگی لە ئەستۆدایە.
وەزیری دارایی بە پێویستیشی زانی لەپێناو خزمەتکردنی زیاتری هاووڵاتییان و کەمکردنەوەی ڕۆتین، هەموو کارئاسانییەک پێشکەش بکەن. جەختیشی كردەوە كە ئەوان وەک وەزارەت و بەڕێوەبەرایەتییەکان هاوکار و هەماهەنگ دەبن بۆ ڕێکخستنەوەی سیستەمی ژمێریاری و دارایی لەم قۆناغەدا لەگەڵ حکوومەتی فیدراڵ.
کۆمێنت (0)
تا ئێستا هیچ کۆمێنتێک نەکراوە.