لەھێرشێكی خۆكوژیدا 24 سەربازی ئەو وڵاتە كوژران

سوپای پاكستان ڕایگەیاند كە لە ھێرشێكی خۆكوژیدا بۆسەر خاڵێكی ئەمنی لە ھەرێمی خەیبەر پاختونخوا باشووری ڕۆژئاوای ئەو ولاتە، 24 سەرباز كوژراون.
سوپای پاكستان لە ڕاگەیاندراوێكدا ئاماژەی بەوەداوە كە لە ڕێگای ئۆتۆمبێلێكی بۆمبڕێژكراو، ھێرشێكی خۆكوژی كراوەتە سەر خاڵێكی ئەمنی لە شاری دیرا ئیسماعیل خان سەربە ھەرێمی خەیبەر پاختونخوا.
ڕاشیگەیاندووە لە ئاكامی ھێرشەكەدا، 24 سەرباز و شەش چەكدار كوژراون.
باسی لەوەیش كردووە كە لەلایەكی دیكەوە ھێزە ئەمنییەكانی پاكستان دوو ئۆپەراسیۆنیان دژبە چەكداران لە شارۆچكەكانی دارازیندا و كۆلاچی سەربە شاری دیرا ئیسماعیل خان ئەنجامداوە.
ئەوەیشی خستووەتەڕوو كە لە میانی ئۆپەراسیۆنەكاندا، شەڕ و پێكدادان لەنێوان ھێزە ئەمنییەكانی پاكستان و ژمارەیەك چەكدار ڕوویداوە.
ڕاشیگەیاندووە كە لە شەڕ و پێكدادانەكەدا، دوو سەرباز و 21 چەكدار كوژراون.