ئەمڕۆ دووشەم، خاتوو ماریۆ راوێژکاری کشتوکاڵی هۆڵەندا لە ئێران و عێراق، سەردانی دیوانی وەزارەتی کشتوکاڵ و سەرچاوەکانی ئاوی کرد و لەلایەن ڕاوێژکارانی وەزارەت و بەڕێوەبەری پەیوەندییەکانی وەزارەت پێشوازی لێ کرا.
وه‌زاره‌تی كشتوكاڵ و سه‌رچاوه‌كانی ئاوی هه‌رێمی كوردستان بڵاوی كرده‌وه: ئامانجی سەردانی خاتوو ماریو بۆ مەبەستی لە نزیکەوە ئاگاداربوون بوو سه‌باره‌ت به پێشکەوتنەکانی کەرتی کشتوکاڵ و ئاودێری لە هەرێمی کوردستان و بەرەوپێشبردن و نوێكردنه‌وه‌ی ئەو یاداشتی لێکتێگەیشتنەی لەنێوان هەرێمی کوردستان و وڵاتی هۆڵەندا کە پێشتر لەنێوان هەردوولادا واژوو کرابوو لە پێناو بووژانەوەی کەرتی کشتوکاڵ و بە بازاڕکردنی بەرهەمە کشتوکاڵییەکانی جوتیارانی هەرێمی کوردستان.
وه‌زاره‌ت هه‌روه‌ها بڵاوی كرده‌وه: لە کۆبوونەوەکەدا شاندی وەزارەت تیشکیان خستەسەر ئەوەی وڵاتی هۆڵەندا پاڵپشتی زیاتری کۆمپانیاکانی هەرێمی کوردستان بکات بۆ ئەوەی هەماهەنگی هەبێت لەنێوان کۆمپانیاکانی وڵاتی هۆڵەندا و کۆمپانیاکانی هەرێم لە پێناو وەبەرهێنان لە کەرتی کشتوکاڵ و ئاودێری و بەبازاڕکردنی بەرهەمی جوتیاران و پیشەسازی کشتوکاڵی.
کۆمێنت (0)
تا ئێستا هیچ کۆمێنتێک نەکراوە.