جێگـری سـەرۆکی پـەرلەمـانی عـێـراق رایگه‌یاند: عێراق بۆته گۆره‌پانی ململانێی نێوان ئه‌مه‌ریكا و ئێران، پێویسته عێراق نه‌چێته ناو ئه‌و ملمڵانێیه به‌ڵام ئه‌وه‌ش زه‌حمه‌ته.
د. بەشـیـر حـەداد ـ جێگـری سـەرۆکی پـەرلەمـانی عـێـراق له میانه‌ی به‌شداریكردن له به‌رنامه‌ی رۆژه‌ڤی كوردستان سه‌باره‌ت به ئاینده‌ی عێراق رایگه‌یاند: ره‌وشی ئێستای عێراق ره‌وشێكی خراپه و ئاڵۆزه به‌ره‌و تونێلێكی تاریك ده‌روات ، پرۆسه‌ی سیاسی به‌بارودۆخێكی خراپ تێپه‌ڕ ده‌بێت ، رۆژ به‌رۆژیش به‌ره‌و خراپتر ده‌چێت، مسته‌فا كازمی كه حكومه‌تێكی كاتیه نه‌یتوانی داواكارییه‌كانی خۆپیشانده‌ران بێنێته ئاراوه ، ته‌نها ئه‌وه نه‌بێت كه واده‌یه‌ك بۆ هه‌ڵبژاردنی پێشوه‌خته دانرا، به‌ڵام ئه‌ویش ئه‌سته‌مه به‌هۆی ئه‌و بارودۆخه ئاڵۆزه‌ی كه عێراق پێی تێپه‌ڕ ده‌بێ هه‌ڵبژاردنی پێشوه‌خته بكرێت.
د. بەشـیـر حـەداد گوتیشی: ئێستا موقته‌دا سه‌دڕ بڕیاری داوه به‌شداری هه‌ڵبژاردن نه‌كات ئه‌وه‌ش ره‌وشه‌كه‌ی ئاڵۆزتركردووه، به‌ڵام ئه‌گه‌ر هه‌یه له بڕیاره‌كه‌ی خۆی پاشگه‌ز بێته‌وه و ئه‌و پێشبینییه‌ش ده‌كه‌م كه بگه‌ڕێته‌وه .
راشیگه‌یاند: ئه‌وه وه‌كو پاكانه‌یه‌ك دێته به‌رچاو چونكه وه‌زیری ته‌ندروستی له‌وانه و وه‌زیری كاره‌باو دارایی له‌وانه ، ئه‌وان شكستیان هێناوه له‌و ڕه‌وشه‌ی عێراق كه پێیدا تێپه‌ڕ ده‌بێت . یان بۆ ئه‌وه بێت كه جه‌ماوه‌ری خۆی كۆبكاته‌وه بۆ ئه‌وه‌ی داوای لێبكه‌ن به‌شدار بێت .
مسته‌فا كازمی به‌ڵێنه‌كانی خۆی جێبه‌جێ نه‌كردووه له ماوه‌ی رابردوودا، به‌ڵام ئه‌وه‌ی كه دیاره ئه‌مه‌ریكا پشتیوانی خۆی نیشانداوه بۆ ئه‌وه‌ی بتوانێت به‌ڵێنه‌كان جێبه‌جێ بكات .
عێراق بۆته گۆره‌پانی ململانێی نێوان ئه‌مه‌ریكا و ئێران ، پێویسته عێراق نه‌چێته ناو ئه‌و ملمڵانێیه به‌ڵام ئه‌وه‌ش زه‌حمه‌ته، دوور نییه بارودۆخی عێراق زۆر ئاڵۆزه و هه‌موو ئه‌گه‌رێكی خۆش و ناخۆش بوونی هه‌یه .
سه‌باره‌ت به رۆڵی كورد له‌و هاوكێشه‌یه‌ی كه بوونی هه‌یه له عێراق ، د. بەشـیـر حـەداد رایگه‌یاند هه‌ر ئاگرێك له عێراقدا هه‌ڵبگیرسێت ئه‌وا پرشك به‌ر كورد ده‌كه‌وێت، بۆیه پێویسته سه‌ركردایه‌تی كورد ئه‌و حسابه بكات و ئێستاش تا راده‌یه‌ك حسابی ئه‌وه‌یان كردووه بۆ ئه‌وه‌ی كه‌مترین زیان به‌ر ئه‌و ناوچه‌یه بكه‌وێت .
ئه‌مه‌ریكا دووباره داوای داواكارییه‌كانی ده‌كاته‌وه و خشته‌یه‌كی بۆ داده‌نێت و زیاتر فشار ده‌كات له سه‌ر حكومه‌ته‌كه‌ی مسته‌فا كازمی ، پێشبینی ئه‌وه‌ش ناكه‌م ئه‌مه‌ریكا ته‌واوی هێزه‌كانی له عێراق بكشێنێته‌وه .
كازمی ده‌بێت خۆی یه‌كلا بكاته‌وه و ئه‌و دوو فاقییه رابگرێت و ناتوانێت هاوسه‌نگی له نێوان ئه‌مه‌ریكا و ئێران دابنێت .
ئه‌گه‌ر موقته‌دا سه‌در به‌رده‌وام بێت له سه‌ر هه‌ڵوێسته‌كه‌ی ئه‌وا ئه‌سته‌مه هه‌ڵبژاردن ئه‌نجام بدرێت ، چونكه ئه‌وان سه‌نگی خۆیان هه‌یه له عێراق، زۆرینه‌ی شیعه له گه‌ڵ هه‌ڵبژاردنن و زۆربه‌ی كوتله‌ی گه‌وره‌كان له‌گه‌ڵ پرۆسه‌كه‌ن .
دارشتنی: سوهێل تاهیر عه‌بدولڵا
کۆمێنت (0)
تا ئێستا هیچ کۆمێنتێک نەکراوە.