ئه‌ڤرو ئێڤارى 20/6/2021 به‌رێز د.على ته‌ته‌ر پارێزگارێ دهۆكێ پێشوازیا به‌رێزان (ماسیو توۆله‌ر) بالیوزێ ئه‌مریكا ل عیراقێ و(روبرت ووله‌ر) كونسلێ گشتى یێ وى وه‌لاتى ل هه‌رێما كوردستانێ كر.
ده‌هڤدینه‌كێدا به‌حسێ ره‌وشا ده‌ڤه‌رێ ب گشتى وره‌وشا ئاواره وپه‌نابه‌ران وپلان وپرۆژێن ستراتیجى یێن حكومه‌تا هه‌رێمێ ئه‌وێن ل ده‌ڤه‌رێ دهێنه ئه‌نجامدان وپه‌ویوه‌ندیێن دوو قولى دناڤبه‌را هه‌رێما كوردستانێ وحكومه‌تا ئه‌مریكا وئه‌و پشته‌ڤانیا ویلایه‌تێن ئێكگرتیێن ئه‌مریكا بو هه‌رێما كوردستانێ پێشكێشدكه‌ن هاته كرن . دته‌وه‌ركێ دن دا به‌حسێ په‌یوه‌ندیێن هه‌رێما كوردستانێ دگه‌ل عیراقا فیدرال وئه‌و نێزیكبونا دناڤبه‌را هه‌ردوو ئالیاندا چێبوى هاته كرن.
بالیوزێ ئه‌مریكا سوپاسیا پارێزگارێ دهۆكێ كر بو وێ پێشوازیا ل وان هاتیه كرن هه‌روه‌سا بناڤێ خو وحكومه‌تا ئه‌مریكا سوپاسیا پارێزگارێ دهۆكێ وحكومه‌تا هه‌رێما كوردستانێ كر بو حه‌واندنا وێ ژمارا زۆر یا ئاواره وپه‌نابه‌ران ل سنورێ پارێزگه‌هێ وهه‌رێما كوردستانێ ودیاركر كو حكومه‌تا ئه‌مریكا دێ یا به‌رده‌وامبیت بو پێشكێشكرنا هاریكاریێن مروڤایه‌تى بو هه‌رێما كوردستانێ ودێ هاندانا كومپانیێن خو یێن ئه‌مریكى كه‌ین كو بهێن ل دهۆكێ پرۆژێن ستراتیجى وپیشه‌سازى وگه‌شتیارى وچاندنێ ل پارێزگه‌هێ ئه‌نجامده‌ن.
ژلایێ خوڤه پارێزگارێ دهۆكێ خوشحالیا خو ب سه‌ره‌دانێ دیاركر هه‌روه‌سا سوپاسیا بالیوز وكونسل وگه‌ل وحكومه‌تا ئه‌مریكا كر هه‌مبه‌ر ئه‌و پشته‌ڤانیا دهه‌موو بیاڤه‌كیدا بو هه‌رێما كوردستانێ وپارێزگه‌ها دهۆكێ پێشكێشدكه‌ن وخواست كو په‌یوه‌ندیێن ئه‌مریكا وهه‌رێما كوردستانێ پتر پێشبكه‌ڤن وئه‌مریكا پتر هاریكاریا هه‌رێمێ وپارێزگه‌ها دهۆكێ بكه‌ت نه‌خاسمه دوارێ مروڤایه‌تیدا.
کۆمێنت (0)
تا ئێستا هیچ کۆمێنتێک نەکراوە.