میدیای عێراق بڵاویكردۆته‌وه كه به‌ره‌به‌یانی ئه‌مڕۆ یه‌كشه‌ممه به دوو فڕۆكه‌ی بێفڕۆكه‌وان هێرشكراوه‌ته سه‌ر بنكه‌ی سه‌ربازی عه‌ین ئه‌سه‌د و له‌لایه‌ن سیستمی به‌رگری مووشه‌كی به‌رپه‌رچی هێرشه‌كه دراوه‌ته‌وه.
له‌لایه‌كی دیكه‌وه واین مارۆتۆ، گوته‌بێژی هاوپه‌یمانیی نێوده‌وڵه‌تیی دژی داعش. رایگه‌یاند كه كاتژمێر 00:15 شه‌وی یه‌كشه‌ممه سه‌نته‌ری پاڵپشتی دیپلۆماسیی هاوپه‌یمانان به مووشه‌كێك هێرشی كراوه‌ته سه‌ر.
به‌گوته‌ی گوته‌بێژی هاوپه‌یمانیی نێوده‌وڵه‌تیی دژی داعش ،مووشه‌كه‌كه له نزیك سه‌نته‌ره‌كه كه‌وتووه‌ته خواره‌وه، به‌ڵام زیانی گیانی و ماددی نه‌بووه و ده‌ستیشیان به لێكۆڵینه‌وه كردووه.
مارۆتۆ گوتیشی: هه‌ر هێرشێك بۆ سه‌ر عێراق، هه‌رێمی كوردستان یان هاوپه‌یمانان پێشێلكردنی ده‌سه‌ڵاتی دامه‌زراوه عێراقییه‌كان و ده‌سه‌ڵاتی یاسا و سه‌روه‌ریی وڵاته‌كه‌یه.
هه‌ر شه‌وی رابردوو زه‌نگی ئاگاداركردنه‌وه له‌نێو بنكه‌ی سه‌ربازی ڤیكتۆریا له نزیك فڕۆكه‌خانه‌ی نێوده‌وڵه‌تیی به‌غدا لێدراوه كه هێزه‌كانی ئه‌مریكای تێدا جێگیره.
کۆمێنت (0)
تا ئێستا هیچ کۆمێنتێک نەکراوە.