ئاڵۆزییەكان لە باشووری عێراق تا دێت زیاتر پەرە ده‌سه‌نێت و له‌هەردوو پارێزگای نەجەف و بابل خۆپێشاندانی ناڕەزایەتی دەستی پێ كرد.
به‌گوێره‌ی چه‌ند سه‌رچاوه‌یه‌كی عێراقی دۆخەكە زۆر خراپه و تادێت خۆپێشاندان به‌رفراوانتر ده‌بێت، گوتیشیان خۆپێشانده‌رانی هه‌ردوو پارێزگا داوای سێ ڕۆژ ماته‌مینی ده‌كه‌ن بۆ گیانی شه‌هیدانی ناسڕییه كه له‌لایه‌ن هێزه ئه‌منییه‌كانه‌وه كوژران، هه‌روه‌ها داوای ده‌ست له‌كاركێشانه‌وه‌ی هه‌ردوو پارێزگاری بابل و نه‌جه‌ف ده‌كه‌ن.
به‌گوێره‌ی زانیارییه‌كان هێزەکانی پۆلیس باڵەخانەی پارێزگای بابلیان لە باشووری عێراق داخست دوای ئەوەی لەلایەن خۆپیشاندەرانەوە گەمارۆ درا و داوای دەستلەکارکێشانەوەی حەسەن مەندیل پارێزگاریان كرد.
ئه‌و سه‌رچاوانه ڕاشیانگه‌یاند لە پارێزگای واست به‌هه‌مان شێوه خۆپێشاندان ده‌ستی پێكرد و خۆپێشاندەران بە شەقامەكانی شاری كوت بڵاوبوونەتەوە، بەپێی سەرچاوەكانی ئه‌منی، خۆپێشاندەرانی نەجەف شەقام و رێگاكانیان داخستووە و هێزە ئه‌منییه‌كان هەوڵی بڵاوەپێكردنیان دەدەن، كاتێك خۆپێشاندەران لە شەقامەكانی مەدینە و ئەبو سخێر رێگاكانیان داخست، لەبەرامبەردا هێزە تەناهییەكان تەقەیان بۆ ئاسمان كردووە بۆ بڵاوەپێكردنیان.
هه‌روه‌ها ئه‌مڕۆ له زیقار ناڕەزایەتییەكان لەسەر پردی نەسڕ بەئاراستەی تەلاری ئەنجوومەنی پارێزگای زیقاڕ بەردەوام بوو و هێزە ئه‌منییه‌كان گولەی راستەقینەیان بەكارهێناوە، ئەوەیش دوای ئەوەی دوێنێ ڕۆژێكی خوێناوی بوو بۆ ئەو شارە و شەش كەس كوژران و زیاتر لە سه‌د و نه‌وه‌د كه‌سیش برینداربوون.
لە شەشەم ڕۆژی خۆپێشاندانەكان كە تا ئێستا نۆ كوژراو و دەیان برینداری لێ كەوتووەتەوە، ناڕەزایەتی پاڵپشتیی بۆ خۆپێشاندەرانی ناسڕییە لە كەربەلا و بابل و واست و دیوانییەیش سەری هەڵداوە، جێی ئاماژه‌یه خۆپیشاندانەکانی پارێزگای بابل دوای خۆپیشاندانەکانی پێنج ڕۆژی پارێزگای زیقار دێت کە بەهۆیەوە نازم وائیلی پارێزگاری زیقار ناچار بە دەستلەکارکێشانەوە کرا.
کۆمێنت (0)
تا ئێستا هیچ کۆمێنتێک نەکراوە.