به‌مه‌به‌ستی زیاتر په‌ره‌دان به بواری بازرگانی و گه‌شتیاری و چاره‌سه‌ری كێشه‌وگرفته‌كانی سنوور، شاندێكی كۆماری ئیسلامی ئێران گه‌یشته سنوری نێوده‌وڵه‌تی حاجی ئۆمه‌ران و له‌لایه‌ن شاندێكی هه‌رێمی كوردستان پێشوازی لێكرا.
ئه‌حمه‌د قادر، قائیمقامی چۆمان، كه هاوكات سه‌رۆكی شاندی هه‌رێمی كوردستانه به كوردستان تیڤی راگه‌یاند: كۆبونه‌وه‌كه به ئامانجی زیاتر بره‌ودان به بواری گه‌شتیاری و بازرگانی هه‌ردوولایه، وه بۆ په‌نجه خسته سه‌ر ئه‌و كێشه‌و گرفتانه‌یه كه له مه‌رزی حاجی ئۆمه‌ران و ته‌مه‌رچین هه‌ن.
شاندی هه‌رێمی كوردستان پێكهاتوون له هه‌ریه‌ك له به‌ڕێوه‌به‌ری گشتی په‌یوه‌ندییه‌كانی هه‌رێمی كوردستان له‌گه‌ڵ ئێران و جێگری به‌ڕێوه‌به‌ری گشتی گومرگی هه‌رێم و به‌ڕێوه‌به‌ری پۆلیسی سۆران و نوێنه‌ری ژووری بازرگانی و قائیمقامی چۆمان و لێپرسراوی كۆمه‌ڵگا و به‌ڕێوه‌به‌ری گومرگی سنووری نێوده‌وڵه‌تی حاجی ئۆمه‌ران و به‌رپرسانی فه‌رمانگه‌كانی ئیداری و ئه‌منی سنوور و هێزه‌كانی پاسه‌وانی سنوور.
شاندی كۆماری ئیسلامی ئێرانیش پێكهاتوون له سه‌ركونسوڵی ئێران له هه‌ولێر و فه‌رمانداری پیرانشار و كۆمه‌ڵێك به‌رپرسی په‌یوه‌ندیدار به بواری بازرگانی و ئه‌منی و گه‌شتیاری له سنووری ته‌مه‌رچین.
وابڕیاره دوای كۆبوونه‌وه‌یه‌كی چڕوپڕ له‌سه‌ر كۆمه‌ڵێك بابه‌تی په‌یوه‌ست به بواری بازرگانی و گه‌شتیاری و ئه‌منی له سنووره‌كه، له كۆنگره‌یه‌كی ڕۆژنامه‌وانی ئه‌نجامی كۆبوونه‌وه‌كه بخه‌نه‌ڕوو.
كه‌ریم سمۆ
کۆمێنت (0)
تا ئێستا هیچ کۆمێنتێک نەکراوە.