به‌هۆی به‌رزبوونه‌وه‌ی نرخی سه‌وزه و میوه و خۆراكه‌كانی دیكه به‌شێكی زۆری هاوڵاتیانی توركیا له‌بڕی كڕینی كه‌لوپه‌ل و میوه به كیلۆ به‌ڵكو به دانه دانه ده‌یكڕن.
ئێستا نرخی یه‌ك كیلۆ پیاز به 10 لیره‌یه و یه‌ك كیلۆ په‌تاته‌ش بووه‌ته 8 لیره، جگه له‌وه‌ی هه‌موو میوه و سه‌وزه‌كانی تر به رێژه‌یه‌كی زۆر به‌رز بوونه‌ته‌وه.
چه‌ند هاووڵاتییه‌ك قسه بۆ ته‌له‌ڤزیۆنه‌كانی توركیا ده‌كه‌ن و ده‌ڵێن جاران به په‌نجا لیره به چه‌ندین كیلۆ میوه و پێداویستی ماڵه‌وه بازاڕمان ده‌كرد، ئێستە به سێ ئه‌وه‌نده‌ش ناتوانین ئه‌و بازاڕییه‌ی جاران بكه‌ین.
هاوكات رۆژنامه‌ی (جومهوریه‌ت)ی توركی راپۆرتێكی له‌م رووه‌وه بڵاو كردووه‌ته‌وه و بۆچوونی چه‌ند دوكاندارێكی له ئیسته‌نبۆڵ وه‌رگرتووه، ئه‌وان نیگه‌رانن له بارودۆخه‌كه و ده‌ڵێن هاووڵاتیان وه‌كو پێویست شت ناكڕن، جاران به عاره‌بانه‌یه‌كه‌وه ده‌هاتن بۆ شت كڕین، ئێستە به عه‌لاگه‌یه‌كی بچووك دانه دانه میوه و پێداویستییه‌كانیان ده‌كڕن
کۆمێنت (0)
تا ئێستا هیچ کۆمێنتێک نەکراوە.