سندوقی كوێت بۆ گه‌شه‌پێدانی ئابووری عه‌ره‌بی رێككه‌وتنێكی له‌گه‌ڵ سندوقی دووباره ئاوه‌دانكردنه‌وه‌ی ناوچه زیان لێكه‌وتووه‌كانی كرده تیرۆریستییه‌كان له عێراق واژووكرد.
به‌پێی رێككه‌وتنه‌كه كوێت، 85 ملیۆن دۆلار بۆ بنیاتنانه‌وه و ئاوه‌دانكردنه‌وه‌ی ئه‌و ناوچانه‌ی كه به ھۆی ھێرش و كرده تیرۆریستییه‌كانه‌وه زیانیان به‌ركه‌وتووه، به عێراق ده‌به‌خشێت.
سندوقی كوێت بۆ گه‌شه‌پێدانی ئابووری عه‌ره‌بی كه سه‌ربه حكوومه‌تی كوێته له راگه‌یه‌ندراوێكدا ورده‌كاری زیاتری له‌باره‌ی گرێبه‌سته‌كه خستووه‌ته‌ڕوو و ئاماژه‌ی به‌وه‌داوه، گرێبه‌سته‌كه قۆناغی دووه‌م و ته‌واوكردنی كۆی گشتی ئه‌و 100ملیۆن دۆلاره‌یه كه پێشتر كوێت له كۆنگره‌ی وڵاتانی كۆمه‌كبه‌خش رایگه‌یاندبوو بۆ پڕۆسه‌ی دووباره بنیاتنانه‌وه و ئاوه‌دانكردنه‌وه‌ی ناوچه كۆنتڕۆڵكراوه‌كان به عێراق ده‌به‌خشێت.
له راگه‌یه‌ندراوه‌كه‌دا ھاتووه "پێشتر كوێت له مانگی كانوونی دووه‌می ٢٠١٨، وه‌ك قۆناغی یه‌كه‌م، ١٥ ملیۆن دۆلاری بۆ جێبه‌جێكردنی پڕۆژه‌كانی ئاوه‌دانكردنه‌وه و بنیتانه‌وه، له‌گه‌ڵ چاككردنی كه‌رتی كاره‌با و دابینكردنی پێداویستی پزیشكی بۆ ٣٢ نه‌خۆشخانه و بنكه‌ی ته‌ندروستی له ناوچه كۆنتڕۆڵكراوه‌كان به عێراق به‌خشیوه".
به‌پێی راگه‌یه‌ندراوه‌كه، پێشتر كوێت سێ قه‌رزی به ٩٨ ملیۆن دۆلار بۆ جێبه‌جێكردنی پڕۆژه‌كانی كه‌رتی وزه، پیشه‌سازی و فێركردن داوه به عێراق، ئه‌مه جگه له‌وه‌ی بۆ جێبه‌جێكردنی پڕۆژه‌كان له كه‌رتی كۆمه‌ڵایه‌تی، كوێت ٢٨٦ میلۆن دۆلاری به عێراق به‌خشیوه.
کۆمێنت (0)
تا ئێستا هیچ کۆمێنتێک نەکراوە.