له‌و ماوه‌یه‌دا كتێبێكی (زانیار سه‌ردار قڕگه‌یی) به ناونیشانی (سه‌روه‌ران له مه‌نزڵگه‌ی شاعیرانی كورد دا) خستنه ڕووی به‌ر دید و ڕوانینی ئه‌و شیعرانه‌ی له‌لایه‌ن شاعیرانی سلێمانیه‌وه بۆ بارزانی و مێژووی خه‌باتی بارزانیه‌كان هۆنراوه‌ته‌وه به قه‌باره‌یه‌كی گه‌وره چاپ و بڵاوكرایه‌وه.
كتێبی سه‌روه‌ران له مه‌نزڵگه‌ی شاعیرانی كورد دا 344 لاپه‌ڕه‌یه و به تیراژی 1500 دانه له چاپخانه‌ی ڕۆشنبیری هه‌ولێر چاپكراوه و جگه له پێشه‌كی و ده‌سپێك نووسه‌ر ناوه‌ڕۆكی كتێبه‌كه‌ی بۆ هه‌ر یه‌ك له شاعیران زیوه‌ر و بێكه‌س و پیره‌مێرد و نه‌جمه‌دین مه‌لا و كاكه‌ی فه‌لاح و كامه‌ران موكری و فه‌ره‌یدون عه‌لی ئه‌مین و عومه‌ر عه‌بدولڕه‌حیم و شێركۆ بێكه‌س و پرۆفیسۆر نه‌سرین فه‌خری و گۆران و ئه‌و ڕه‌حمان به‌گی بابان و محه‌مه‌د ساڵح دیلان و له‌تیف قه‌ره‌داغی و دكتۆر ئیحسان فواد و مه‌لا حه‌سه‌نی زه‌نگه‌نه و دكتۆر شۆ و قادر محه‌مه‌د سه‌عید و عه‌بدولقادر قڕگه‌یی و حه‌مه‌ی مه‌لا كه‌ریم و ئه‌حمه‌د سه‌لام، ئه‌و كتێبه وه‌ك نووسه‌ریش له ناوه‌رۆكه‌كه‌ی هێمای بۆ كردوه بریتیه له به‌سه‌ركردنه‌وه‌ی 22 شاعیر كه 21 یان خه‌ڵكی سلێمانین و ته‌نیا یه‌كێیان خه‌ڵكی سه‌قزه كه ئه‌ویش مه‌لا حه‌سه‌نی نه‌وحی یه و سه‌رجه‌میان هۆنراوه‌ی جوان و به نرخیان هۆنیوه‌ته‌وه له‌گه‌ڵ په‌خشانێكی شه‌هید محه‌مه‌د قوودسی كه گفتوگۆیه‌كه له نێوان محه‌مه‌د قوودسی و چیای شیرینی بارزان.
شاعیران ناوه‌رۆكی شیعره‌كانیان له‌سه‌ر لایه‌نی نه‌ته‌وه‌یی و كوردایه‌تی و سه‌ركرده‌كانی كورد و ڕووداو و كاره‌ساته‌كان و سروشتی جوانی و خۆشه‌ویستی و خاك و نیشتمان و ئه‌ویندارین به‌و هۆنراوانه‌یان كاڵایان به باڵادا بڕیوه و سۆزێكی یه‌كجار زۆری خۆشه‌ویستیان بۆ سه‌ركرده‌ی نه‌ته‌وه‌یی مسته‌فا بارزانی ده‌ربڕیوه و به كارێزمایی ئه‌و ڕابه‌ره نه‌ته‌وه‌ییه‌وه سه‌رسام بوون به ڕاده‌یه‌ك كه مایه‌ی هه‌ڵوه‌سته له‌سه‌ر كردن و له‌سه‌ر نووسینی زیاترن.
سه‌رچاوه/ هه‌ولێر
كوردستان تیڤی/ كامران
کۆمێنت (0)
تا ئێستا هیچ کۆمێنتێک نەکراوە.